Каримов фонди Сариосиё воқеалари иштирокчиси, захирадаги полковник хотиралари билан бўлишди (видео)

Каримов фонди ўз Facebook’даги саҳифасида 2000 йилда бўлиб ўтган Сариосиё воқеалари ҳақида мақола ва унинг видеосини эълон қилди.

2000 йил август ойида Ўзбекистон жанубида ҳукумат кучлари жанговар бўлинмалари ҳамда мамлакат ҳудудига суқулиб кирган ЎИҲ халқаро террорчилар тўдаси ўртасида қуролли тўқнашувлар рўй берди. Келажак ҳақида хомҳаёлларга берилган жангарилар Ўзбекистонда қонли излар қолдирди, шу билан бирга, улар Тожикистондаги фуқаролар уруши даврида, қолаверса, Қирғизистон, Афғонистон ва Россияда бир қатор қўпорувчилик ҳаракатларини амалга оширган эди.

Сариосиё воқеалари иштирокчиси бўлган захирадаги полковник Ботир Абдуллаев ўша кунларни хотирлайди:

2000 йилнинг августи. Ўзбекистон сарҳадига халқаро террорчилар тўдаси ҳужум уюштирди. Мен хизмат қилаётган, ташкил топганига ҳали кўп вақт бўлмаган махсус операциялар бўйича баталёнлар жангариларга қарши кураш олиб бораётган эди.Кунларнинг бирида Ўзбекистон Биринчи Президенти, Олий бош қўмондон Ислом Каримов бизнинг қисмга ташриф буюрди. У киши ёнимизга келиб, оталарча самимият ила муаммолар билан қизиқди, яна қандай техника ёки ускуна зарурлигини сўради. Аммо ҳаммасидан ҳам Ислом Абдуғаниeвичнинг бизга қарата қилган хитоби мен ва қуролдош дўстларим хотирасида қолди. ‘Ёдда тутинглар, – деди Олий бош қўмондон, – агар кимдир сизларнинг тўғри душман ўқига, тикка ўлимга боришингиз ҳақида буйруқ берганимни айтса, асло ишонманглар: мен ҳозиргача бундай буйруқ бермадим ва бундан кейин ҳам бермайман!Сирасини айтганда, асабийлашиш ва қўрқувдан асар йўқ эди. Биз ўша лаҳза қалбимизда ўзимиз ва Олий бош қўмондоннинг кучига ишончни ҳис этдик. Ислом Абдуғаниевичнинг асосий маслаги ҳар қандай йўл билан душман ҳамласини қайтариш эмас, балки мустақил ва дунёвий Ўзбекистон учун жонини беришга тайёр инсонларнинг ҳаётини сақлаб қолиш эди.

Ботир Абдуллаев, захирадаги полковник

https://www.facebook.com/IslamKarimovFoundation/videos/440572189866198/