Бухорода 4 яшар қизалоқ кул ва чўғ ўрасига йиқилиб, оғир жароҳат олди

«Карвон савдо» МЧЖга қарашли ахлатхона яқинидаги кабобнинг кул ва чўғи ташланадиган ўрасига 4 яшар қизалоқ тушиб кетиб, оғир тан жароҳати олди. Бу ҳақда «Дарё»га 4 яшар қиз Гулчирой Равшанованинг онаси Гулсара Раҳмонова хабар берди.

Билдиришича, 2015 йилда туғилган Гулчирой Равшанова онаси ва отаси билан 14 июль куни эрталаб, чамаси соат 7:30 ларда «Карвон савдо» бозорига кираётганда унинг ахлатхонаси муюлишидаги кабобнинг кул ва чўғи ташланадиган ўрасига тушиб кетган. Ўра усти очиқ ҳолатда, хавфсизлиги таъминланмаган ва ер билан бир хил симметрияда бўлган.

— Бозорнинг чап томонидан кириладиган йўлак қум тупроқли бўлгани учун ахлатхонанинг шундоқ муюлишида иссиқ ўра борлиги мутлақо маълум эмас. Биз билан тенгма-тенг юриб келаётган қизимиз кутилмаганда чинқириб юборди. Не кўз билан кўрайликки, у иссиқ ўрага тушиб кетганди. Бирпасда оёқ терилари чўғ аралашган кулда қовжираб қола бошлаган қизимизни зудлик билан таксида касалхонага олиб келдик, — деди Гулсара Раҳмонова.

Республика Шошилинч тиббий ёрдам илмий маркази Бухоро филиали томонидан қўйилган ташхисга кўра, иссиқ кулдан иккала оёқ товон, қисман сон, болдир циркуляр соҳасининг II-ИИИ АБ даражали 15% контрактда куйиши, куйиш шоки оғир даражаси, ИФ-25 бирлик ҳолати қўйилган.

— Қизалоқни куйиш шокининг оғир даражаси аҳволида келтиришди. Биринчи ёрдам кўрсатилди. Куйиш жароҳатлари, асосан, танасининг иккала оёқ товон, қисман сон, болдир соҳасида юзага келган. Колликвацион некроз билан қопланган жароҳат циркуляр жойлашганлиги учун панжаларида ҳаракат йўқ, деярли, сезиши йўқолган эди. Атрофларида шиш кузатилиб, дистал сигментларда қон таъминланиши ҳам бузилган эди. Шуларни эътиборга олиб, беморга зудлик билан в/в кетамин оғриқсизлантириш усулида декомпрессион некрофассиотомия қилинди. Бетадинли асс боғлам қўйилди, — деди Комбустиология бўлими врачи Хушмамад Арабов.

Гулчирой Равшанованинг оғир шок ҳолатдан чиқиши учун барча тиббий ёрдамлар кўрсатилган. Иккинчи кун қизалоқ аста-секин ҳушига кела бошлаган.

Бемор қиз онасининг айтишича, шифокорлар томонидан барча муолажалар қилинган. Айни пайтда ҳам беморни соғлом ҳаётга қайтиши учун бор чораларни кўришмоқда. Бироқ аёл «Карвон савдо» бозори маъмурияти ва тадбиркорларнинг эътиборсизлиги оқибатида фарзанди шу кўйга тушганидан ҳамда уларнинг хабар олмаётганидан норозилигини билдирди.

— Йўқ, ўринбосарим ҳамда участка нозири икки марта бориб, уларнинг ҳолидан хабар олишди, уйига ҳам боришди. Моддий кўмак учун тайёрлигимизни ҳам билдирдик. Аёл эса шашлик кули ва чўғини ўрага ташлаган тадбиркорларнинг кимлигини сўраяпти. Тўғриси, аёл нима истаётганини ўзи билмаяпти, — деди «Карвон савдо» МЧЖ раҳбари Шоҳрух Қодиров. — Бундан ташқари, қизи даволанаётган шифохонада барча муолажалар бепул.

«Дарё» мухбири Бухоро шаҳар Ички ишлар органлари фаолиятини мувофиқлаштириш бошқармаси 4-сон ИИБ ҳуқуқбузарликлар профилактикаси бўлими таянч пункти профилактика инспектори Алишер Сатторов ҳамроҳлигида «Карвон савдо» МЧЖга қарашли ахлатхона яқинида жойлашган шашлик кули ва чўғлари ташланадиган ўралар билан танишди. Ўра атрофи фожиа рўй бергандан кейин 80–100 сантиметр баландликда ғишт ва бетон қоришмаси билан ўралган. 1–1,5 метр баландликдан қаралса-да, кул ўранинг иссиқ тафти юзга урилади.

— Бу ҳолат биринчи марта эмас, бир неча бор кул ўрага одамлар тушиб кетган. Айнан шу атрофда савдо қилаётганимиз учун ҳам бунга гувоҳ бўлганмиз, — деди тилла буюмлар сотувчи тадбиркорлардан бири.

Маълум бўлишича, бозор маъмурияти вакиллари ҳам бундан хабардор бўлса-да, ўра атрофи қатор йиллардан буён хавфсизлантирилмаган. Усти очиқ, қум тупроқ йўлак билан симметрик кўринган ва бир бурчакда жойлашган кул ўранинг бор-йўқлиги билинмайди.

— Айрим тадбиркорлар қоидага риоя қилмай, чўғни ўчирмай ташлашган, — дея ҳолатни изоҳлади бозор раҳбари.

Тадбиркорлар эса бозор маъмурияти томонидан кўрсатилган ва белгиланган жойда кабоб кулларини ташлашини билдирди.

«Карвон савдо» бозорининг иккинчи орқа тарафида жойлашган ахлатхона олдида шашлик кули учун алоҳида контейнер қўйилган. Контейнернинг бир неча кундан буён бўшатилмагани оқибатими, ахлатхонадан 5–6 метр нарида ҳам ҳали чўғининг тафти совимаган шашлик кули уюмланиб ётибди. Атроф турли ахлат чиқиндилари билан кўримсиз аҳволда. Ҳудуд барқарор санитария-эпидемиологик ҳолатда эмас.

Нафақат бозорга тегишли ахлатхоналар атрофи, балки қатор умумий овқатланиш масканларида ҳам таом ва пишириқлар тайёрлаш санитария меъёрларига амал қилинмаган. Ҳудуд кўчалари антисантар аҳволда.

Бозорда ерга қўйилиб сотилаётган қишлоқ хўжалик маҳсулотлари билан ҳам шундай салбий ҳолатни кузатиш мумкин. Кўринишидан маълум, савдо қилинаётган маҳсулотларнинг лаборатория текширув хулосаси бор-йўқлигини сўрашга ҳам ҳожат йўқ. Озиқ-овқат ва кийим-кечак, нон, полиз ва гўшт маҳсулотларини бир жойда қалаштириб сотилиши борасида эътибор берилмаган. Маҳсулотларнинг хавфсизлик кўрсатгичлари бизга номаълум. Аммо шашлик кул ва чўғи ташланадиган ўранинг атрофи вақтида хавфсизлантирилмаганидек, антисанитария аҳволда сотилаётган бу маҳсулотларнинг одамлар соғлиғига қандай таъсир кўрсатиши ҳақида гапирмаса ҳам бўлади. «Кўза кунда эмас, кунида синади».

«Карвон савдо» бозорида фаолият юритаётган давлат санитария-эпидемиология назорат бўлими вакили «Дарё» мухбири саволларига жавоб бермай, телефон гўшагини қўйиб қўйиши унинг функсионал вазифасини нечоғли бажараётганини кўрсатди.

— Кун кеч бўлгани ва бозорнинг охирлаб қолгани учун туманлардан мева-чева сотувчилар келиб, ерда савдо қилишади. Бу муаммо бартараф этилади, — деди бозор раҳбари телефон орқали навбатдаги боғланувда. — Шашлик кули ўрасига тушиб кетган қизалоқ масаласига келсак, моддий қўллаб-қувватлаймиз. Қўлдан келгунча, соғлиғини тиклашга қарашамиз.

Профилактика инспектори Алишер Сатторовнинг айтишича, ушбу масала юзасидан Бухоро шаҳар ИИОФМБ (Ички ишлар органлари фаолиятини мувофиқлаштириш бошқармаси) томонидан суриштирув ҳаракатлари олиб борилмоқда.