24 июль куни Истанбулда Инновацион ривожланиш вазири ўринбосари Ойбек Норинбоев ва Истанбул технопарки бош директори Билол Топчу ўртасида англашув меморандуми имзоланди. Бу ҳақда «Дарё»га вазирлик матбуот хизмати маълум қилди.
Меморандумда инновацияларни амалиётга жорий этиш, илмий-тадқиқотларни ҳамкорликда олиб бориш, икки давлат олимлари, тадқиқотчилари ва муҳандисларининг энг долзарб илмий масалаларни биргаликда ечишлари учун шарт-шароитлар яратиш, хусусан, семинарлар, конференциялар ташкиллаштиришга келишилди.
Илмий-технологик парклар ва инкубаторларнинг фаолиятини режалаштириш, ривожлантириш ва бошқариш бўйича тажриба алмашиш, технопарклар резидентларининг халқаро бозорга чиқишларини таъминлаш, технопаркларни малакали кадрлар билан таъминлаш ҳам икки ташкилот ҳамкорлиги доирасига киритилди.
Имзоланган меморандум доирасида Истанбул технопарки Ўзбекистонда сейсмик тадқиқотлар ўтказиш, учувчисиз технологиялар, дрон ва термокамера тизимларини яратиш бўйича қўшма лабораториялар, кластерлар, инкубаторларни йўлга қўйиш, олимлар учун ҳамкорликда тренинг ва стажировкалар ташкиллашда кўмаклашиши назарда тутилган.
Истанбул технопарки нуфузли халқаро ташкилотлар ҳамда Қатар, Россия, Хитой, Англия, Швейцария, Германия, Малайзия каби мамлакатларнинг компаниялари билан ҳамкорликда турли соҳаларда лойиҳалар ошириб келмоқда. Технопарк қошида инкубаторлар ва технологиялар трансфери идоралари ҳам жойлашган бўлиб, уларнинг барини Туркия ҳукумати қўллаб-қувватлаб келмоқда.
Технопаркда юқори технологияларга асосланган тадбиркорлик билан шуғулланувчи 1500 та ширкат фаолият юритади. Айни кунларда технопарк доирасида тахминан 300 та лойиҳа, 5000 та стартап амалга оширилмоқда, бундан ташқари 44 та савдо белгисига стандартлар ишлаб чиқарилиб, рўйхатдан ўтказилган.
Изоҳ (0)