Фарғона вилояти ҳокими Шуҳрат Ғаниев томонидан Марғилон шаҳар 1-сонли давлат ихтисослашган умумтаълим мактабида сайёр қабул ўтказилди.
Фарғона вилояти Президент халқ қабулхонаси матбуот хизматининг «Дарё»га маълум қилишича, унда Марғилон, Фарғона ва Қувасой шаҳарлари ҳамда Фарғона, Қува туманларидан жисмоний ва юридик шахсларнинг мурожаатлари кўриб чиқилди.
Қабулда жами 122 нафар фуқаролар қатнашиб, улардан бевосита вилоят ҳокимига 86 та мурожаат келиб тушган. Жисмоний ва юридик шахс вакилларининг 25 та уй-жой билан таъминлаш ва таъмирлаш, 8 та ишга жойлашиш, 4 та банк кредити ажратишдаги муаммолар, 7 та моддий ёрдам кўрсатиш ва бошқа мурожаатлар кўриб чиқилган.
Қабул жараёнида вилоят бошқарма ва ташкилотлар раҳбарлари, прокуратура, ИИБ ва суд органлари ҳамда шаҳар, туманларнинг сектор раҳбарлари иштирок этган.
Ўтказилган қабул натижалари бўйича 15 нафар мурожаатчиларнинг масаласи жойида ижобий ҳал этилган, 8 нафар мурожаатчиларга тушунтириш берилган, 63 та мурожаатлар бўйича амалдаги қонунларга кўра ўрганиб чиқиш учун қабулда иштирок этган вилоят бошқарма, ташкилотлари раҳбарлари ҳамда шаҳар, туман ҳокимларига топшириқлар берилган.
Изоҳ (0)