Ойнинг қисман тутилиши 16 июлдан 17 июлга ўтар кечаси содир бўлади. Бу ҳақда ЎзФА матбуот хизматига таяниб, ЎзА хабар берди.
Бу тутилиш дунё вақти билан соат 21:31 да бошланади. Ўзбекистонда бу ҳодисанинг юз бериши 17 июль тунги 02:31 да юз беради.
Мазкур тутилишни мамлакатнинг барча ҳудудларида кузатиш мумкин. Ой маҳаллий вақт билан 16 июль куни соат 23:42 да ярим сояга киришни бошлайди, 17 июль тунги 01:00 да сояга киради.
Соядан соат 04:00 чиқади, ярим соядан эса соат 05:19 да чиқиб кетади, яъни тутилиш тугайди.
Қуёш соат 05:04 да чиқади. Унинг максимал фазаси 0,66 га етади. Ернинг табиий йўлдоши тутилиш пайтида ер соясининг жанубий қисмидан ўтади. Ойда бу вақтда қисман ва тўла қуёш тутилиши кузатилади.
Шунингдек, тутилиш Жанубий Америка, Европа, Африка, Осиё, Австралия ва Россия (Чукотка, Камчатка ва Узоқ Шарқ соҳилларидан ташқари) ҳудудларида ҳам кузатилади.
Қуёш тутилишидан фарқли равишда Ой тутилиш давомида кўриниб туради. Ой тутилишнинг катта фазасида қизил ёруғлик сочади ва умуман йўқолиб кетмайди. Тутилишни оддий кўз билан ҳам кузатиш мумкин.
Одатда қисман ой тутилиши вақтида бу ҳодисани оддий кўзда илғаш қийин.
Шунинг учун сизда дурбин ёки кўриш трубаси бўлиши мақсадга мувофиқ, Ой юзи яхшироқ кўринади ва сизга ушбу астрономик ҳодисадан завқ олишингизга ёрдам беради.
Изоҳ (0)