Ўзбекистонда ўлим ҳолатларининг ўртача 78 фоизи юқумли бўлмаган касалликлар туфайли юз бермоқда. Бу ҳақда «Дарё»га Соғлиқни сақлаш вазирлиги матбуот хизмати маълум қилди.
Мутахассислар хавфли омиллар профилактикаси ва юқумли бўлмаган касалликларга чалинган беморларга тиббий ёрдамни ташкил қилиш ва кўрсатиш тизимини яхшилаш, шунингдек, соғлом турмуш тарзига амал қилиш орқали Ўзбекистонда юқумли бўлмаган касалликлар сабабли барвақт ўлим топиш ҳолатларининг олдини олиш мумкинлигини таъкидламоқда.
Шундан келиб чиққан ҳолда Соғлиқни сақлаш вазирлиги томонидан мунтазам равишда соғлом турмуш тарзига риоя этиш борасидаги оммавий тадбирлар ўтказиб келинмоқда. Бу бежиз эмас. Мутахассисларнинг маълум қилишича, ҳафтада атиги 2,5 соатлик жисмоний фаоллик эрта ўлим ҳолатларини 28 фоиз, юрак касалликлари эҳтимолини эса 20 фоизга камайтирар экан.
Оддийгина юриш орқали юрак қон-томир касалликлари, инсульт, хавфли ўсмалар, нафас олиш аъзоларининг сурункали касалликлари ва қандли диабет каби юқумли бўлмаган касалликлар олдини олган бўламиз.
Одамларни жисмоний фаолликка чорловчи оммавий тадбирларнинг навбатдагиси 13 июль, шанба куни мамлакат бўйлаб ташкил этилди.
Жумладан, Олмазор туманида жойлашган Тошкент тиббиёт академияси стадионида ҳам оммавий гимнастика ва 5 километр масофага юриш машғулотлари ўтказилди. Уларга қўшимча равишда тиббиёт ходимлари, Хотин-қизлар қўмитаси, маҳалла фаоллари ва ёшлар билан ҳамкорликда «Саломатлик стартлари», «Саломатлик майдончаси», «Биз тамакисиз худуд учун овоз берамиз» тадбирлари ҳамда маҳаллаларда ёшлар билан зарарли одатларнинг салбий оқибатлари ҳақида суҳбатлар уюштирилди.
Изоҳ (0)