Бухорога келган «Китоб карвони» орқали манзилларга 128 миллион сўмлик китоблар бепул тарқатилди

Бухорода китоб тарғиботига бағишланган «Китоб карвони» акцияси ўтказилди. Бу ҳақда вилоят ҳокимлиги Хотин-қизлар қўмитаси «Дарё»га хабар берди.

Тадбирда китоб тарғиботига оид кўргазмалар билан жиҳозланган ва турли жанрлардаги 10530 дона китоб тўплами ортилган Дамас автомашиналаридан иборат «Китоблар карвони» Бухоро шаҳридан вилоятнинг мавжуд 13 та туман, шаҳарларига фаоллар ва ташаббускор ёшлар ҳамроҳлигида манзиллар сари йўл олган. 128 миллион сўмлик китоблар бепул тарқатилган. Шунингдек, китоблар карвонига «Бухоро китоб олами» савдо мажмуаси томонидан ҳам 650 дона китоб совға қилинган.

— «Китоблар карвони» акцияси доирасида вилоят Халқ таълими бошқармаси ҳамда «Ўздавкитобтаъминот» билан 340 миллион сўмлик шартнома тузилди ва унинг бошланғич 15 фоизлик тўлови амалга оширилди. Бугун жамиятда интернет тизими ривожланаётганига қарамай, одамлар ўртасида эзгуликни тарғиб этишда, барибир, китобнинг ўрни сақланиб қолмоқда. Муносиб тарзда китоб ўқишга бўлган эҳтиёж ҳам олдинги йилларга қараганда анча юқори. «Китоблар карвони» ана шу маънавий эҳтиёжни баҳолиқудрат тўлдиришга қаратилган, десак адашмаган бўламиз, — деди вилоят Хотин-қизлар қўмитаси раиси Феруза Ибрагимова.

Акция доирасида «Китобхон оила», «Кутубхонам нурга тўлди» тадбирлари ўтказилган.

Маълумот ўрнида: Бухоронинг 12 та ҳудудида янги китоб дўконларини қуриш ишлари бошланган. Айни пайтда эса вилоят бўйича жами 32 та китоб дўкони мавжуд. Бозорлардаги ёйма китоб расталари сони эса 30 дан ортиқ.