28 июнь куни Telegram’даги «Подслушано в Бухаре» каналида Бухоро шаҳрининг 6-даҳасида жойлашган янги уйлардан бирида ёнғин чиққани ҳақида хабар берилганди.
Фавқулодда вазиятлар вазирлиги Бухоро вилоят ЁХБ куч воситаларини бошқариш марказий гуруҳи бошлиғи, капитан Рустам Рўзиевнинг «Дарё»га маълум қилишича, ёнғин аслида Бухоро шаҳридаги Турди Фароғий кўчасидаги қаровсиз бўлган чиқинди тўпланган жойда содир бўлган. Ёнғин ўз вақтида ва зудлик билан бир неча дақиқаларда бартараф этилган.
— Чиқиндилар енгил ёнувчи ташландиқ маҳсулотлардан иборат бўлгани учун олов гуркираб, тутун тарқатган. Жароҳат олганлар, ёки талофат кўрган хонадонлар йўқ, — деди Рустам Рўзиев.
Ҳолат жойида бориб ўрганилганда, Турди Фароғий кўчасида янги турар жой бинолари ҳамда мактабгача таълим муассасаси барпо этилаётгани, ёнғин эса қурилиш объектини ажратиб турувчи тунука тўсиқлар билан ўралган чиқинди тўпланган жойда содир бўлгани аниқланди. Шаҳар марказидаги қаровсиз ва ободонлаштиришга муҳтож манзилда «Шаҳзода мебел», «Файз мебел», «Музаффар файз» мебел ишлаб чиқариш корхоналари ҳамда «Проформ плус» спорт клуби жойлашган. Маълумотларга кўра, ҳудуднинг пана ва қаровсиз манзилида жойлашган чиқиндихона ёнида «Музаффар файз» мебел ишлаб чиқариш корхонасидан чиққан қурилиш чиқиндилари ўзбошимчалик билан тўплаб борилган.
— «Истиқлол» маҳалламизда 22 та кўп қаватли уй мавжуд бўлиб, 4062 нафар аҳоли яшайди. Қурилиши битказилмаган уйлар ҳам 20 га яқин. Бироқ 2 та чиқиндихона бор. Шулардан бири ҳудуддаги «Музаффар Файз» масъулияти чекланган жамиятнинг шундоқ ортида. Раҳбариятига бир неча бор мурожаат этишимизга қарамай, чиқиндилар ахлат қутиларга эмас, унинг шундоқ яқинида ўзбошимчалик билан тўплаб борилган. «Корхона чиқиндиларию маиший чиқиндилар ўзларингизники, йиғиштириб олинглар, унинг ёқимсиз ҳиди уйгача киради» дея кўп бор билдирганмиз, — деди Турди Фароғий кўчаси, 73-уйда яшовчи фуқаро Муаттар Йўлдошева.
Шунча чиқиндилар тўпланиб, аҳолига ноҳушлик кайфиятини уйғотар экан, нега «Maxсус автохўжалик» масъулияти чекланган жамияти эътиборсиз, деган савол туғилди.
Маълум бўлишича, «Музаффар Файз» масъулияти чекланган жамияти, аслида «Maxсус автохўжалик»га қарашли экан. «Дарё» мухбири саволларига Бухоро шаҳридаги «Maxсус автохўжалик» масъулияти чекланган жамияти раҳбари Алишер Назаров чиқиндилар мебел ишлаб чиқарувчиларига тегишли бўлмаганини айтди.
— У ердаги чиқинди «Музаффар Файз»га тегишли бўлмаган. Шаҳарда кесилган дарахт шох-шаббалари эди. «Maxсус автохўжалик» ҳисобида 150 та машина бор. Вазирлар Маҳкамасининг 787-сонли қарорига кўра, «Maxсус автохўжалик» автомашиналари фақатгина маиший чиқиндиларни олади. Қурилиш моллари ёки ҳашакларни шартнома асосида оламиз. Ушбу бўйича қарорда тўлиқ ёзиб қўйилган. Саволингиз бўлса, хат билан чиқинг. Ҳолатга оид суратлар бор. Қўл телефоним оддий. Сурат керак бўлса, ёзма равишда билдиринг, — дейди Алишер Назаров.
28 июнь куни тунги соат 00:20 ларда ёнғин, айнан, чиқиндихонада эмас, унинг ёнида ўзбошимчалик билан уюмлаб келинган жойда содир бўлган.
— «Maxсус автохўжалик» раҳбари нотўғри гапирган. Айнан шу манзилда «Музаффар Файз»га тегишли чиқиндилар ахлат уюмига айланиб, тўпланиб қолган. У манзилда ҳеч қандай дарахт йўқ. Демак, шох-шаббалар ҳам. Ахлат уюми қурилиш материаллари чиқиндиларидан иборат бўлган. Биз шахсан Алишер Назаровнинг ўзини «Музаффар Файз» масъулияти чекланган жамияти чиқиндилари шундоқ чиқиндихона ёнида тўпланиб бораётгани, бу аҳолига ноҳушлик туғдириб, атроф-муҳитнинг ҳам янада ноободлигини таъминлашга таъсир кўрсатаётгани ҳақида кўп бор билдирганмиз. Ҳатто «Чорасини кўрмасангиз, юқори ташкилотга мурожаат этишга мажбур бўламиз», деганмиз. Неча маротаба огоҳлантирилишига қарамай, тозалашмайди, эътибор қаратишмайди, — 47-сонли «Истиқлол» маҳалла фуқаролар йиғини раиси Зебо Зоҳидова.
Ҳудуд профилактика инспектори ҳам маҳалла раиси фикрини тасдиқлаб, айнан маҳалладаги шу ҳудуд оғриқли нуқта эканлигини таъкидлади.
Чиқиндихона пана жойда бўлгани учун ахлат қутиларидан ҳам ахлатлар ўз вақтида олинмаган. Атроф-муҳитнинг янада ифлосланишига таъсир кўрсатган. Шунингдек, қурилиш ишлари давом этаётгани учун ҳудуд анча-мунча ободонлаштиришга муҳтож. Ачинарли аҳволда.
Изоҳ (0)