Андижон вилояти ҳокимлиги матбуот хизмати ижтимоий тармоқларда тарқалиб кетган аудиоёзув юзасидан «Газета.uz»га изоҳ берди. Ҳокимлик изоҳида, жумладан, тиббиёт воситаларини сотиш бўйича корхоналар монополияси ўрнатилганини маълум қилинган.
Мавзуга доир: Соғлиқни сақлаш вазирлиги Андижон вилояти ҳокимининг ҳақоратли муносабати ёзилган аудиодаги ҳолат бўйича баёнот берди
Ўзбекистон Президентининг 2017 йил 7 ноябрдаги «Фармацевтика тармоғини тубдан такомиллаштириш чора-тадбирлари тўғрисида»ги ПF-5229-сонли Фармонига кўра, 2018 йилнинг апрель ойида Gold Grown Pharma компанияси томонидан ижтимоий аҳамиятга эга тиббий буюмлар рўйхатига киритилган тиббиёт қўлқоплари (перчатка) ишлаб чиқарувчи корхона ташкил этилди ва 150 та янги иш ўрини яратилиб, маҳаллий бюджетга ойма-ой 75 миллион сўмгача солиқ тўловлари амалга ошириляпти.Шунингдек, 2018 йил декабрь ойида Makro Farm Andijan компанияси томонидан шприц ва инфузион системалар ишлаб чиқариш корхонаси ташкил этилди. 110 та янги иш ўрини яратилди. Ҳар ойда маҳаллий бюджетга 60 миллион сўмгача солиқ тўловлари келиб тушмоқда.
Ушбу корхоналарда ҳар йили 24 миллион дона ностерил ва 54 миллион жуфт стерил хирургик тиббий қўлқоплар ҳамда 136 миллион дона шприцлар ишлаб чиқарилади. Нарх масаласига келсак, бугунги кунда давлат тиббиёт муассасаларига 2 мл. ҳажмдаги шприц 260−300 сўмдан, 5 мл. шприц 280−500 сўмдан, 10 мл. шприц 320−600 сўмдан харид қилинмоқда. Республика комиссияси томонидан улгуржи сотиш нархлари бир дона ностерил резина қўлқоплари учун 650 сўм ва бир жуфт стерил хирургик резина қўлқоплари учун 2500 сўм этиб белгиланган.
Ҳозирда Makro Farm Andijan компанияси томонидан 2 мл. ҳажмдаги шприц 220 сўмдан, 5 мл. шприц 245 сўмдан, 10 мл. шприц 310 сўмдан, Gold Grown Pharma компанияси томонидан ностерил резина қўлқоплари 500 сўмдан, бир жуфт стерил хирургик резина қўлқоплари 1800 сўмдан давлат тиббиёт муассасаларига етказиб берилмоқда.
2019 йил давомида Андижон вилоятида фаолият олиб бораётган давлат тиббиёт муассасалари Gold Grown Pharma компанияси билан 8,4 миллион дона ностерил қўлқоплар, 9,6 миллион жуфт стерил хирургик қўлқоплар харид қилиш учун ҳамда Makro Farm Andijan компанияси билан 5 турдаги 11,2 миллион дона шприцларни харид қилиш учун шартномалар имзоланган ва изчил бажариб келинмоқда.
Мазкур шартномалар имзоланиши ва тиббиёт буюмларини давлат тиббиёт ташкилотларига сифатли ва арзон нархларда етказиб берилиши ҳисобига тиббиёт қўлқоплари харидидан бюджет учун 6 миллиард 902 миллион сўм ҳамда шприц харидидан 2,1 миллиард сўм маблағлар иқтисод қилинган, дея маълум қилди ҳокимият.
Шу тариқа ҳосил бўлган қўшимча 9 миллиард сўм маблағ эвазига 600 ўринли замонавий мактаб қуриб, жиҳозлаш мумкин. Ёки 2 та янги боғча барпо этиш имконияти мавжуд. Айнан юқоридаги сумма 4 та боғча ёки мактабни реконструксиясига кифоя қилади. 9 миллиард сўмга 3 та ҚВП ёки бутун бошли тиббиёт бирлашмасини замонавий кўринишда реконсруксия қилиб, жиҳозласа бўлади. Шу маблағга 90 та оила учун уй қуриш, ёки 60 километрга ичимлик суви тармоғини тортиш мумкин. Юқорида иқтисод қилинган маблағ 80 километр йўлни шағаллаш ёки 30 километр йўлга асфальт ётқизиш ҳаражатларини қоплайди.
Шунингдек, 14 январдаги ПF-5629-сонли Фармонга асосан Андижон тумани, Хортум қишлоғи, Заҳириддин Муҳаммад Бобур массиви ҳудудида жами 52 гектар ер мадонида «Андижон-фарм» эркин иқтисодий зонаси ташкил этилмоқда. Ушбу ҳудудда (Gold Grown Pharma компанияси ҳамда Makro Farm Andijan компанияси ва бошқа ташаббускорларнинг) 2019−2020 йиллар давомида умумий қиймати 1 триллион 20,6 миллиард сўм миқдоридаги, шундан хорижий инвесторлар маблағлари ҳисобига 84 миллион долларлик янги фармацевтика лойиҳалари ишга туширилиши ҳамда 1 415 нафар янги иш ўринлари яратилиши режалаштирилган.
Вилоятда мазкур лойиҳаларни амалга оширишда 2019−2020 йиллар давомида импорт қилинаётган фармацевтика маҳсулотларини маҳаллийлаштириш ҳисобига 524,7 миллион дона дори воситалари ишлаб чиқариш йўлга қўйилиб, соҳанинг экспорт салоҳияти 15 фоизга ўсишига ҳамда дори воситалари ва тиббий буюмларнинг таннархи 30 фоизгача пасайишига эришилади.
Вилоят ҳокимлиги матбуот хизматининг маълум қилишича, вилоят ҳокимининг биринчи галдаги вазифаси аҳоли муаммоларини ўрганиш ва халққа хизмат қилишдан иборат.
Ўзбекистон ҳудудининг юздан бир фоизини ташкил қилувчи вилоятда мамлакат аҳолисининг қарийб юздан ўн фоизи истиқомат қилади. Табиий ўсиш 53 минг кишига тўғри келади. Бу дегани аҳоли сони ҳар 12 ойда Хонобод шаҳри (42 минг) ёки Улуғнор тумани (54 минг) аҳолисига тенг миқдорда кўпаймоқда. Зичлик борасида нафақат мамлакатимизд ёки Осиёда, балки дунёда етакчи ўринларда турувчи Андижон вилоятида ижтимоий-иқтисодий муаммолар алоҳида долзарблик касб этиши табиий ҳол.
Вилоят ҳокимининг қабул кунлари юзлаб фуқаролар мурожаат қиладилар. Эрталаб 8 дан бошлаб, кеч соат 22 гача давом этадиган очиқ мулоқотларда аҳоли муамолларини ҳал қилиш бўйича чоралар кўрилади. Ҳокимнинг фейсбук, иnstagramмдаги саҳифаларига, бевосита мобил телефонига келиб тушадиган мурожаатлар ҳам эътибордан четда қолмайди. Уларнинг ечимини топиш, юзага келадиганларининг олдини олиш юқори жадаллик билан ишлашни тақозо этади. Бир кун, ҳатто бир соатлик сусткашликнинг таъсири сезилади, дея қайд этди вилоят ҳокимлиги матбуот хизмати.
«Шу ўринда бўлиб ўтган йиғилишнинг ижтимоий тармоқларда ёритилишига тўхталсак. Йиғилишнинг амалий самараси четда қолиб, айнан эҳтиросли жиҳатлари бўрттириб кўрсатилган. Вилоят ҳокими ўша дори воситалари атрофидаги муаммоларни аввал ҳам бир неча бор кўтарган. Мутасаддиларга уларнинг нарх-наво, сифат кўрсаткичларини таҳлил қилиш юзасидан топшириқ берган эди. Ижтимоий тармоқларда бу жиҳатлар тушириб қолдирилган. Бу каби ёндашувни шов-шув кўтариш, сохта обрў орттириш деб баҳолаш мумкин», — дейилади баёнотда.
Изоҳ (0)