UNESCO жаҳон меросини ҳимоя қилиш қўмитаси Самарқанддаги кенг кўламли қурилиш ишлари шаҳарнинг тарихий объектларига путур етказишидан хавотирда эканини билдирди. Бу ҳақда «Узнеwс» хабар берди.
Қўмитанинг 30 июндан 10 июлгача Боку шаҳрида бўлиб ўтадиган 43-йиғилишида кўриладиган масалалар ҳужжатида жаҳон мероси рўхатидан жой олган объектларнинг ҳолати кўриб чиқилган.
Ушбу рўйхатда Самарқанд шаҳрининг ҳозирги ҳолатига алоҳида эътибор берилган.
Маълумки, Самарқанд шаҳрида ҳозирда кенг кўламли қурилиш ишлари олиб борилмоқда. 2022 йилги Шанхай саммити учун туристик объектлар, меҳмонхоналар ва кўп қаватли бинолар ташкил қилинмоқда, шунингдек, «Samarkand City» лойиҳаси амалга оширилмоқда. UNESCO экспертлари ушбу қурилиш жараёнлари жаҳон мероси объектлари ҳудуди ва унга яқин бўлган жойларда қайта қурилиш ва бузилишларга сабаб бўлишидан хавотирга тушган.
Шу муносабат билан Жаҳон мероси маркази Ўзбекистонга тарихий меросни қўриқлаш бўйича мониторинг тузиб, унинг ҳисоботини тақдим этишини сўраган.
Лекин Марказга реконструксия жараёнига оид бирорта ҳужжат келиб тушмаган.
Ҳозирда қурилишларнинг тарихий объектларга потенциал таъсири баҳоланмагунча ҳамда объектлар хавфсизлиги тўлиқ таъминланмагунча махсус комиссия Ўзбекистондан реконструксия ишларини тўхтатишини сўрамоқда.
Изоҳ (0)