Наманганлик энг фаол журналист келгуси йили 27 июнь куни Spark автомобили билан тақдирланади ва бу рағбатлантириш келгусида анъанага айланади. Бу ҳақда вилоят ҳокими Хайрулло Бозоров маълум қилди, дея хабар беради «Дарё» мухбири.
Вилоят оммавий ахборот воситалари ходимлари, ноширлар, матбаачилар, фахрий журналистлар иштирокидаги тадбир Наманган шаҳридаги «Шердор» тантаналар уйида ўтказилди. Унда иштирок этган вилоят ҳокими Хайрулло Бозоров вилоят журналистларининг йирик анжуманлар, хусусан, «Гуллар байрами» ва халқаро инвестфорумни ёритишдаги жонбозлиги, ушбу тадбирларга илк бор хориждан ҳам кўплаб журналистлар келганини эътироф қилди.
Вилоятда ОАВнинг анъавий турлари қатори интернет-нашрлари ва ижтимоий тармоқлар ҳам жадал ривожланиб бораётгани, уларнинг айримлари юз минглаб ўқувчи эга эканлигини қайд этди.
Байрамда бир гуруҳ журналистлар ва блогерларга вилоят ҳокимининг фахрий ёрлиғи ҳамда совғалар топширилди. Шунингдек, махсус номинациялар ғолиблари ҳам тақдирланди.
Наманганда рўй бераётган янгиликлар ва ўзгаришларни кенг ёритган, бу борада энг катта аудиторияга эришган журналистга келгуси йилдан бошлаб касб байрамида Spark автомобили берилиши эълон қилинди.
Тадбирда тақдирланган журналистлар сўзга чиқди, байрам концерт дастури намойиш қилинди.
Қайд этиш жоизки, Наманганда «Гуллар байрами» ғолибларига Spark автомобиллари топширилиши анъанага айланиб улгурган.
Изоҳ (0)