Сирдарёлик ғаллакорлар 21 июнь куни ғалла хирмонини 191 387 тоннага етказди ва шартномавий режани 100,4 фоизга бажарди. Вилоят ҳокимлиги ахборот хизмати хабарига кўра, вилоят тарихида илк бор ғалла бўйича шартномавий режа 15 иш кунида бажарилди.
Сирдарё вилоятида бу йил 1992 нафар фермер хўжалиги томонидан 85 минг гектар майдонга ғалла экилган эди. 2019 йилги ғалла ўрим-йиғим мавсумига 360 та ғалла ўриш комбайни жалб этилиб, 168 та отряд шакллантирилди. Мазкур отрядларда туман ҳокимликлари, ички ишлар бўлими ходимлари ва бошқа ташкилотлардан иборат 1638 нафар масъул ҳамда 1416 та юк автомобили,103 та кўчма устахона ва 114 та ёнилғи ташиш воситалари хизмат қилган.
«Шунингдек, сирдарёлик фермерларимизнинг янги замонавий ҳамда Хоразм вилоятидан ёрдамга келган ўрим комбайнлари томонидан ўрилган ғалла вилоятнинг шартномавий режасини шараф билан уддаланишида катта ҳисса қўшганлигини алоҳида эътироф этамиз», — дейилади ҳокимлик ахборотида. Қайд этишларича, ғалла ҳосилини етиштириш ва давлатга дон сотиш бўйича шартномавий режаларни Мирзаобод, Сардоба ва Ховос туманлари деҳқон ва фермерлари биринчилардан бўлиб бажарган.
Боёвут туманидаги «Эзгу ният самараси», «Хумо ҳамкор» фермер хўжаликлари ҳосилдорликни 80 центнерга етказиб, режани 125 фоизга, Сирдарё туманидаги «Хасан Чилтонов» фермер хўжалиги деҳқонлари ҳосилдорликни 75 центнерга етказиб, режани 120 фоизга, «Эргаш Эшонқулов» фермер хўжалиги 72 центнердан ҳосил йиғиб-териб олиб, режани 122 фоизга, Сайхунобод туманидаги «Шоҳиста Олимжоновна» фермер хўжалиги жамоаси 75 центнерлик маррани эгаллаб, режани 120 фоизга, «Абдувоит ота» фермер хўжалиги ҳосилдорликни 70 центнерга етказиб, режани 123 фоизга бажарган.
Хайриддин Эшмуродов, Қаҳрамон Ҳўжамқулов, Қилич Дониёров, Бегзод Абдурасулов сингари комбайн операторлари кунига 100—120 тоннадан ғалла донини ўриб, қайд этишларича, «давлат шартнома режасининг бажарилишига ўзларининг катта ҳиссаларини қўшди». «Сирдарё фермерлари Президент ва ҳукуматнинг халқ фаровонлиги йўлида олиб бораётган сиёсатига амал қилган ҳолда, ҳосилдорликни 55 центнерга етказишни мақсад қилган», — деб қўшимча қилинган расмий ахборотда.
Изоҳ (0)