Тошкентнинг «Локомотив» клубида бош мураббий ўзгаради.
«Дарё»га маълум бўлишича, қониқарсиз натижалар сабаб жамоанинг айни дамдаги бош мураббийи Андрей Фёдоров ишдан олинади. Унинг ўрнига эса ҳозирга қадар «Локомотив»клуби президенти маслаҳатчиси сифатида ишлаб келган Самвел Бабаян тайинланади.
Таъкидлаш жоиз, бир муддат аввал бир нечта спорт нашрлари Самвел Бабаян «Локомотив»га бош мураббий бўлиши ҳақида ёзганди. Бироқ клуб расмийлари ЎзАга бу хабарларни рад этиб, хабар қилганди.
Андрей Фёдоров 2018 йил апрель ойида Андрей Микляев ўрнига «Локомотив» бош мураббийи этиб тайинланганди.
Бу ҳақда тез орада клуб расман эълон қилиши кутилмоқда.
Маълумот учун, Самвел Бабаян ЎФФ (ҳозир ЎФА) Ижроия Қўмитаси Бюросининг 2018 йил 15 январдаги 3-сонли қарорига мувофиқ футболга алоқадор ҳар қандай фаолият билан шуғулланишдан умрбод четлаштирилган эди. Кейинроқ мутахассис Латвияда иш бошлагач, ташкилот бу қарорнинг фақат Ўзбекистонда амал қилишини маълум қилганди.
Аммо орадан бир йил ўтиб, Бабаяннинг дисквалификацияси четлатишдан икки ҳафта ўтибоқ «Бунёдкор» клуби кафиллиги остида бекор қилингани маълум бўлди.
Таъкидлаш жоиз, Бабаян четлатилган даврда мамлакат футболига Умид Аҳмаджонов жавобгар эди. У эса 13 июнь куни ташкилот биринчи вице-президентлигидан истеъфога чиқди. Аҳамджоновнинг ўрнига ФИФА ҳаками Равшан Эрматов Ўзбекистон футбол ассоциацияси вице-прездентига айланди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)