Ўзбекистон ёшлар иттифоқи ҳамда Тошкент шаҳридаги Инҳа университети ҳамкорлигида «Digital Generation Camp» лойиҳаси ишга туширилди. Бу ҳақда «Дарё»га Ёшлар медиа маркази маълум қилди.
IT соҳасидаги мазкур лойиҳа асосида 18—22 июнь кунлари «Ёшлар оромгоҳи»да «Digital Generation Camp» ёзги оромгоҳи ташкил этилади. Унда иштирок этиш учун лойиҳанинг 5 та йўналиши бўйича 16 ёшдан 25 ёшгача бўлган 90 нафар ёш саралаб олинди.
«Digital Generation Camp»га йиғилган иштирокчиларга энг етук маҳаллий мутахассислари ва халқаро экспертлар машғулотлар ўтади. Дарслар орқали қатнашчиларнинг қобилияти аниқланади. Иштирокчилар ўқув платформа олдидан зарур ишчи буюмлар билан таъминланиб, 5 кун мобайнида амалий ва назарий машғулотларда ўз тажрибаларини бойитади. IT соҳасида мутахассислар билан фикр алмашиш жараёнида янги яратилаётган лойиҳалар устида иш бошлайди.
Оромгоҳнинг сўнгги куни иштирокчилар якка ва жамоавий тарзда ўз лойиҳаларининг тақдимотини намойиш этади. Ҳар бир қатнашчи фаол иштироки учун халқаро сертификат билан тақдирланади. Лойиҳа аъзолари бирга ишловчи жамоани яратиш орқали келгусида яратиладиган лойиҳаларни ҳам жамоавий амалга оширишни ўз олдига мақсад қилган.
Лойиҳа эркин фикрловчи, технологик трендларга қизиқувчи ёшларни дастурлаш, робототехника, медиа ва дижитал маркетинг, дизайн, киберспорт йўналишлари бўйича бирлаштиради.
Изоҳ (0)