Москванинг ВДНХ кўргазмасидаги Ўзбекистон павильони асл ҳолига келтирилмоқда. Бу ҳақда "Мир 24" телеканали хабар берди.
Совет иттифоқи даврида кўргазмадаги 66-павильон Ўзбекистон учун ажратилган ва бу ерда республика халқ хўжалиги ютуқлари намойиш қилинган.
Яқинда Тошкентда бўлиб ўтган МГИМО битирувчилари форумида Россия маданият вазири Владимир Мединский ушбу павильон Ўзбекистонга фойдаланиш учун муддатсиз берилишини маълум қилганди.
Павильон биноси 1950 йилларда Москвада кенг тарқалган «Сталин ампири» ҳамда ўзбек миллий меъморчилиги аралашмаси услубида қурилган. Ушбу павильон ўз вақтида ВДНХнинг энг чиройли биноларидан бири бўлган, лекин кейинчалик қаровсиз қолган.
2017 йилда павильон Москва шаҳар мэрияси ихтиёрига топширилганидан сўнг бу ерда кенг қамровли реставрация ишлари бошлаб юборилди. Реставраторлар ушбу павильонни эски ҳолатига келтиришга ҳаракат қилмоқда. Улар бу ердаги ўйма эшиклар ҳақиқий санъат асари эканлигини таъкидлайди.
ВДНХ маъмурияти таъмирлаш ишлари йил охирига қадар якунига етишига умид қилмоқда.
Изоҳ (0)