Ўзбекистон Олий Мажлиси Қонунчилик палатаси Ўзбекистонда автотранспорт воситасидан фойдаланишда яқин қариндошлар учун ишончнома олиш тизими бекор қилиш тўғрисида қарор имзолади, деб хабар берди Repost.
Ушбу таклиф «Менинг фикрим» порталида 14 000 дан ортиқ овоз тўплади.
«Машинаси бор одамлар яхши билади. Бизда шундай тартиб белгиланганки, оила аъзолари, яқин қариндошлар бир-бирининг машинасидан махсус ишончномасиз фойдалана олмайди. Соддароқ айтсак, битта уйда, ҳовлида яшасак ҳам мен отамнинг, отам менинг номимга расмийлаштирилган автотранспортдан фойдаланиши учун анча вақт ва пул сарфлаб ишончнома олишимиз шарт. Ака-укалар, опа-сингиллар билан ҳам худди шундай аҳвол. Бу ҳам оилавий бюджетга зарар, ҳам ҳужжат тайёрлаш учун кўп вақт сарфлайсиз. Бегона одамларга ишончнома беришни тушуниш мумкиндир, лекин ота-она боласи, ака-ука, опа-сингил бир-бирига ишончнома бериши, очиғини айтсак қадриятларимизга ҳам, менталитетимизга ҳам тўғри келмайди», — дейилган эди мурожаат матнида.
Қайд этилишича, бунга қадар ишончномасиз машина бошқариш энг кам ойлик иш ҳақининг бир баравари миқдорида жарима тўлашга сабаб бўларди, ишончномани расмийлаштиришга 670 минг сўм бож тўланарди.
Изоҳ (0)