Meduza нашри мухбири Иван Голунов ўзига нисбатан илгари сурилган гиёҳванд моддалар бўйича айблов тўхтатилгани сабаб озодликка чиқди. У ўзини қўллаб-қувватлаб турган барчага миннатдорчилик билдириб, олдингидек суриштирув ишларини давом эттиришини маълум қилди.
Иван Голунов — Россияда антикоррупция терговларига ихтисослашган таниқли журналист. Унинг материаллари асосан Meduza ва «РБК» нашрлари чоп этилади. Оилали, 36 ёш.
Иван 6 июнь куни Москвадаги «Гуллар булвари»да қўлга олинган эди. 7 июнь куни терговчи Голуновнинг таниши билан боғланиб, журналист мефедрон (гиёҳванд модда) сотишга уринганида қўлга олинганини маълум қилган.
Кейинроқ, Россия Ички ишлар вазирлиги Иваннинг ёнида 5 та ўрамда кукунсимон модда, уйидан эса 3 селофан пакетда шу турдаги моддалар ва тарози топилганини маълум қилиб, буни исботловчи суратларни эълон қилганди. Бироқ Голуновнинг яқинлари ва ҳамкасблари эълон қилинган суратлар журналистнинг уйида олинмаганини билдиришган. Натижада полиция 9 та суратнинг 8 таси Голунов яшаган уйда олинмаганини тан олган.
Иван Голуновнинг фикрича, ўзининг қўлга олинишига дафн маросимлари бизнеси бўйича ўтказган суриштирувлари сабаб бўлган. Голуновнинг бу борадаги суриштирувнинг мавзуси «Тобут, қабристон, миллиардлаб рубль. Амалдорлар, куч тузилмалари ва жиноятчилар дафн маросими бозорини қандай қилиб бўлиб олган» деб номланади.
Журналистнинг ҳамкасблари ва жамоатчилик вакиллари ҳам худди шу фикрда. Шу сабабли улар фаоллик кўрсатиб, нозорилик билдирди. 8 июнь куни Москва судининг қарорига кўра, Иван Голунов икки ой уй қамоғига ҳукм қилинди.
Голуновни нафақат Meduza’даги ҳамкасблари, балки бошқа кўплаб нашрлар, федерал ОАВда ишловчи журналистлар, шунингдек, таниқли шоу-бизнес вакиллари (Земфира, «Би-2» ва Борис Гребенщиков ва ҳоказо) ҳам қўллаб-қувватлади.
10 июнь куни тонгда Россиянинг «Ведомости», «Коммерсантъ» ва «РБК» газеталари тарихда биринчи бор бир хил муқова чоп этиб, Иван Голуновнинг ёнини олиб чиқди.
ОАВ журналистнинг қўлга олинишида ҳуқуқ-тартибот идораларининг ҳаракатлари қонун доирасда бўлганлиги текшишни талаб қилди. Кўплаб журналистлар норозилик акциясини уюштириб, Голуновни озод қилинишини сўради.
Россия президентининг матбуот котиби Дмитрий Песков 10 июнь куни журналистлар билан Голунов ишини муҳокама қилган. У журналистга нисбатан айбловда эълон қилинган суратлар сохта эканлигини тан олган.
11 июнь куни Россия ИИВ вазири Владимир Колокольцев журналистдан барча айбловлар олиб ташланганини шахсан маълум қилди. Колокольцевнинг таъкидлашича, Голунов иши билан шуғулланган барча ходимлар текширув ўтказилаётгани сабаб хизмат вазифасидан озод этилган. Текширув ишлари Тергов қўмитасига берилган.
Иван Голунов Москва вақти билан соат 20:53 да Москва ИИВ ББ тергов бошқармасининг биносидан чиқиб келган. Журналистнинг бошқармани тарк этаётганини «Дожд» телеканали тўғридан-тўғри эфирга узатган. Голуновни кўчада ўнлаб журналистлар ва яқинлари кутиб турарди.
«Бунақа воқеа мен билан содир бўлиши ҳеч қачон хаёлимга ҳам келмаган. Менга етказилган маънавий зарарга бадал — бу каби воқеа мамлакатимизда бошқа ҳеч ким билан содир бўлмаслиги лозим», — дейди Голунов.
Изоҳ (0)