Аввалроқ интернетда ППХ ходими иштирокида юз берган воқеа тасвирланган видео тарқалган. Унда бир машина ҳайдовчиси кундузи чироғини ёқмай кетаётган ППХ машинаси ҳайдовчисига: «Янги қоида сизларга тааллуқли эмасми?» қабилида савол берган, ППХ ҳайдовчиси эса йўқ дегандек қилиб, савол берган ҳайдовчига машинани чеккага олиш ҳақида буйруқ берган.
ИИББ матбуот хизматидан Kun.uz’га хабар беришларича, ҳодисада иштирок этган ходим Тошкент шаҳар ИИББ тизимидаги ППХ бригадасида ишлайди. «Қонун барча учун баробар. Ҳамма ходимлар кундузги вақтда машиналарида яқинни ёритувчи чироқларни ёқиб юриши шарт», — дея таъкидлаган бош бошқарма матбуот хизмати вакили.
Маълум бўлишича, ҳодисадан сўнг шахсий таркиб билан суҳбат ўтказилган. Унда ходимларга фуқаролар билан қўпол муомалада бўлишга йўл қўйиш керак эмаслиги тушунтирилган. Ҳайдовчини тўхтатган ППХ ходими ҳайфсан олган ва унга нисбатан хизмат текшируви тайинланган. «ППХ бригадасининг барча шахсий таркиби қўпол муносабатда бўлиш борасидаги ҳар бир ҳолат бўйича таъсир чоралари қўлланилиши ҳақида огоҳлантирилди», — дея қайд этиб ўтган ИИББ вакиллари.
Бундан ташқари, ходимларга йўл ҳаракати қоидаларига риоя қилиш, шу жумладан, яқинни ёритувчи чироқлар ёки кундузги сигнал чироқларини ёқиб юриш ҳақида яна бир бор эслатилган. Ходим йўл ҳаракати қоидаларининг бузилиши учун қайси ҳолат ва шароитларда жазога тортилмаслиги ҳам билдириб ўтилган.
Изоҳ (0)