Суриядан қайтарилган она-болалар соғломлаштириш муассасаларида жойлаштирилмоқда, деб хабар берди Sputnik «Ўзтекстилсаноат» уюшмаси матбуот хизматига таяниб.
Шавкат Мирзиёев топшириғига биноан 30 май куни 156 нафар Ўзбекистон фуқаролари, асосан аёллар ва болалар махсус авиарейсда Тошкент шаҳрига олиб келинган эди. Уларнинг 48 нафари аёллар, 106 нафари болалар бўлиб, алдов йўли билан Яқин Шарқдаги қуролланган можаролар ҳудудига олиб чиқиб кетилган.
Суриядан қайтарилган турли оғир ҳаётий қийинчиликларни бошдан кечирган ўзбек фуқароларига республика ҳукумати ҳар томонлама ёрдам бермоқда. Жумладан, уларнинг соғлиғини қайта тиклаш ҳамда жамиятга қайтариш бўйича ишлар олиб борилмоқда.
«Ўзтекстилсаноат» уюшмаси томонидан қайтган фуқароларга ёрдам кўрсатилди. Хусусан, ушбу соҳа корхоналари қайтганларга спорт либослари, болалар ва катталар либослари, чақалоқлар комплекти, шунингдек рўмол, ички кийим ва бошқа маҳсулотлар топширилган.
Шу билан бирга, ҳарбий можаролар зоналаридан аёллар ва болаларни қайтариш ишлари давом этади, шу муносабат билан уюшма қайтган барча фуқароларга кўмак кўрсатади.
Қайтарилган аёллар ва болалар ҳозирда соғломлаштириш муассасаларида жойлаштирилмоқда. Улар тиббий ёрдам билан таъминланади, шунингдек, уларга руҳий ва ижтимоий кўмак, таълим ва бошқа ижтимоий дастурлар бўйича ёрдам кўрсатилади.
Изоҳ (0)