Олмаотада XVI Евросиё медиа форуми бўлиб ўтди

Қозоғистоннинг Олмаота шаҳрида 22—24 май кунлари Евросиё медиа форуми бўлиб ўтди.

Форумнинг биринчи куни дунёнинг турли бурчакларидан ташриф буюрган медиа-экспертлар турли мавзуларда мастер-класслар ўтказди. Жумладан Reuters агентлигининг собиқ журналисти Нельсон Грейвс экологик журналистика, «Ал Жазира» телекомпаниясининг Contrast медиастудияси раҳбари Заҳра Расул виртуал реаллик яратиш, кинорежиссёр, сценарийнавис ва продюсер Сергей Бодров кинода продюсерлик қилиш, Женни Климан фрилансер бўлиб ишлаш, «ТАСС» агентлигининг фотоахборот таҳририяти раҳбари Григорий Дукор фотожурналистнинг сирлари, Иво Борум мобил журналистика, Россиянинг Биринчи каналидан Елена Афанасьева ТВ аудиторияси турли авлодларининг ўзига хосликлари ва digital-медиа ҳақида мастер-класс ўтказди.

23 май куни форумнинг расмий очилиш маросими бўлиб ўтди. Унда форум ташкилий қўмитаси раиси Дариға Назарбоева, Арманистон президенти Армен Саркисян, Қозоғистон ахборот ва ижтимоий тараққиёт вазири Даурен Абаев, Олмаота акими Бауиржан Байбек ва бошқалар иштирок этди. Қозоғистон президенти Қосим-Жомард Тўқаевнинг форум иштирокчиларига табрик сўзларини Даурен Абаев ўқиб эшиттирди.

Форумнинг иккинчи ва учинчи кунида «Глобаллашув: дунё тараққиётнинг янги моделларини изламоқда», «Истеъмол инқирози», «Масс-медиа рақамли реаллик: биз чақирувни қабул қиламизну?», «Сунъий интеллект даври: инсоният тараққиётими ёки инқирози?», «Ишонч инқирози: Глобал миқёсда кучларнинг бўлиниши», «Блогерлар: виртуал оламнинг янги рок юлдузлари?» каби мавзуларда мажлислар ўтказилди.

60 га яқин мамлакатдан келган 600 дан ортиқ делегатлар иштирок этган XVI Евросиё медиа форуми 24 май куни ўз ишини якунлади.