Сўнгги вақтларда айрим нохушликларни ислом билан боғлаш, «имом ундай бўлди», «масжид бундай бўлди» қабилидаги хабарлар берилиши ҳолатлари кузатилмоқда. Бу ҳақда Ўзбекистон мусулмонлари идораси маълум қилди.
Аввалроқ «Деновда ҳамшаҳрига марихуана берган масжид ноиби қўлга олинди», «Уйи томсиз қолган имомга ёрдам берайлик», «Даҳшатли алангадан мў’жиза туфайли омон қолган имом зудлик билан операция қилиниши зарур» каби мақолалар эълон қилинган эди.
Куни кеча эса «Қўқонда имом ёрдамчиси гиёҳванд моддалар билан қўлга тушди» сарлавҳали хабарда косиблик билан шуғулланиб, шу билан бирга, Қўқон шаҳридаги масжидлардан бирида имомга ёрдамчилик қилиб келган бир шахс гиёҳванд моддалар билан қўлга тушиб, жазо тайинлангани ҳақидаги хабар эълон қилинди.
Асосий касби косиблик бўлган инсоннинг имомга ёрдамчилик қилганини («ёрдамчи» деган штат йўқ) сарлавҳага олиб чиқишдан мақсад нима? Нега сарлавҳа «Косиб гиёҳванд моддалар билан қўлга тушди» шаклида эмас? Боз устига мазкур шахс ўтган йили ишдан бўшаб кетган бўлса?
Жиноят қилган одамнинг динга муносабати, масжидга алоқаси олдинги планга олиб чиқилмаслиги лозим. Бу одам жиноят қилган экан, қонуний жазосини олди. Бироқ ҳар қандай имкониятдан фойдаланиш илинжида диний идора, масжид ё имом, умуман, ислом шиорларини ёмонотлиқ қилишга уриниш дуруст эмас, балки гуноҳдир.
Аслида ўша жиноятчининг асл касби қолиб, имомга ёрдамчи эканининг сарлавҳага чиқарилишининг ҳам ўзига яраша сабаблари бор:
диндор одам жиноятчи бўлмайди;
диндор одам оғуфурушлик билан шуғулланмайди;
диндор одамнинг бу каби қабиҳлик билан шуғулланиши бошқаларникидан икки чандон даҳшатли ҳодиса саналади;
Косиб — ҳунарманд, имомлик эса пешволик.
Мақолага сарлавҳа қўйилганда ана шу жиҳатларга эътибор қаратилган. Бироқ ўқувчини қизиқтириш, жиноятнинг кўламини бўрттириб кўрсатиш учун қўлга тушган жиноятчиларнинг намоз-ниёзи борини динга боғлайвериш одамларда дин ва диндорларга нисбатан салбий фикрни шакллантириш, улардан ҳадиксирашга сабаб бўлиб қолиши мумкин.
Изоҳ (0)