«Дарё»да ўтган ҳафтанинг энг муҳим ва муҳокамали хабарлари шарҳини бошлаймиз.
Юнусобод туманининг ўтган йили қўлга олинган ҳокими Бахтиёр Абдусаматов дастлаб Жиноят кодексининг 205-моддаси (ҳокимият ёки мансаб ваколатини суиистеъмол қилиш) ва 210-моддасида (пора олиш) кўзда тутилган жиноятларни содир этганликда айбланаётган эди. 13 май куни суд ҳукмига кўра у 5 йилга озодликдан маҳрум этилди.
Ўтган йилги хабарга кўра, ҳоким инвесторга жой тақдим этиш мақсадида 400 минг доллар миқдоридаги пулни пора тариқасида олаётган вақтида ушланган. Собиқ ҳоким ДХХга топширган 400 минг доллар унинг рафиқасига қайтариладиган бўлди.
* * *
Самарқандда юз берган даҳшатли қотилликни дайжестимизга олиб чиқдик. Иштихонлик бир оиланинг беш нафар аъзосини ваҳшийларча ўлдириб, Қўшработ тумани ҳудудида Damas автомобили ичига ташлаб кетилган. Ўзбекистон Бош прокуратураси қотиллик юзасидан ахборот берди. Бош прокурорнинг алоҳида назорати ўрнатилди. Жиноятчилар шахси ҳозирча аниқланмади.
* * *
Бу ҳафта энергетика соҳасидаги янгиликларга бой бўлди. Тошкентда «Ўзбекистон нефть ва гази — OGU 2019» халқаро кўргазмаси, «Энергетика, энергияни тежаш, атом энергетикаси, энергиянинг муқобил манбалари — Power Uzbekistan 2019» халқаро кўргазмаси ва халқаро Ўзбекистон энергетика конференцияси очилди. Энергетика вазирлиги Франция компанияси билан ҳамкорликда қўшма корхона ташкил этиши маълум бўлди. Reuters ёзишича, Ўзбекистон келгуси йилда энергетика соҳасини ривожлантириш учун 2 миллиард долларгача маблағ жалб қилишни режалаштирмоқда.
* * *
Андижон вилояти Бўз туманининг номи ўзгартириладиган бўлди. Бўз тумани ҳокимининг вилоят фаоллари билан йиғилишда айтишича, туман номи ўзига ярашмай қолган. Шундай қилиб, Бўз номи «Бўстон»га айланадиган бўлди ва туманга 25 миллиард сўм маблағ ажратилди.
* * *
Бу ҳафтада Ўзбекистоннинг таниқли маданият намояндалари дунёдан ўтди. Таниқли театр ва кино актрисаси, Ўзбекистон халқ артисти Яйра Абдуллаева 89 ёшида оламдан ўтди. 16 май куни эса қатор детектив ва маърифий асарлари билан ўқувчилар эътиборини қозонган Ўзбекистон халқ ёзувчиси Тоҳир Малик 73 ёшида вафот этди. Шунингдек, машҳур хонанда, Ўзбекистон, Қорақалпоғистон ва Туркманистон халқ артисти Ортиқ Отажонов 72 ёшида дунёдан кўз юмди.
* * *
Президент Шавкат Мирзиёев 16 май куни Андижон вилоятига борди. Давлат раҳбари Хонободдаги Xon Tex City масъулияти чекланган жамияти фаолияти билан танишди, Хонобод сиҳатгоҳига ташриф буюрди ҳамда андижонликларнинг яшаш шароитларини кўздан кечирди. Андижон ҳокимлигида ўтказилган йиғилишда «Мактаб ўқитувчисининг маошини 1000 долларга етказмоқчимиз», деди. Andijan City мажмуаси лойиҳасини маъқуллади.
* * *
17 май куни президент Шавкат Мирзиёев Халқаро валюта жамғармаси бошқарувчи директори Кристин Лагардни қабул қилди. Лагард хоним аввалроқ Нью-Йорк ва Пекин шаҳарларида ўзбекистонликлар билан учрашган эди. ХВЖ директори Марказий банкда ўтказилган учрашувда Ўзбекистонда кредитлаш даражасини қисқартириш зарурлигини таъкидлади. Кристин Лагард, шунингдек, Самарқанд шаҳрига ҳам ташриф буюриб, Регистонни кўздан кечирди.
* * *
Ўтган ҳафтада ижтимоий тармоқларда тарқалган фотосуратлар куннинг иссиғида чироғини ёқиб юрган автомобилларнинг олд қисми ёниб кетганлигини акс эттирди. 10 майдан кучга киритилган қоида чуқур ўйланмасдан татбиқ этилганига фуқаролар тобора амин бўлиб қолди. Олий Мажлиснинг уч нафар депутати автомобилларнинг кундузи чироқ ёқиб юриши шартлиги ҳақидаги қоидани бекор қилиш бўйича ҳукуматга таклиф киритди. Тошкент шаҳар ИИБ воқеага ойдинлик киритиб, машиналарнинг ёниши чироғининг ёқилишига боғлиқ эмас, деб изоҳлади.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)