Ўзбекистон Бош прокуратураси матбуот хизмати баъзи ОАВларда пайдо бўлган «Хоразмлик фермерлар: Прокурор шоли экмаслик ҳақида мажбурий тилхат ёздириб олмоқда» сарлавҳали хабарлар юзасидан «Дарё»га изоҳ берди.
Маълум бўлишича, Шовот туманида Вазирлар Маҳкамасининг 29 мартдаги «2019 йил ҳосили учун қишлоқ хўжалиги экинларини оқилона жойлаштириш ва маҳсулот етиштиришнинг прогноз ҳажмлари тўғрисида»ги қарори ҳамда унинг ижроси юзасидан вилоят ҳокимининг 4 апрелдаги қарори талабларига риоя қилинмаётганлиги аниқланган.
Хусусан, Бош прокуратура матбуот хизматининг қайд этишича, туманда суғориладиган экин майдонларининг жами 3975 гектари, шундан юқоридаги қарорлар билан жойлаштирилган режадаги 485 гектар сабзовот, 213 гектар полиз экинлари, 198 гектар картошка, 332 гектар кунжут, 802 гектар мош ва 2873 гектар озуқа экинлари экилмаган.
Ушбу 3975 гектар сабзовот, полиз, картошка, кунжут, мош ва озуқа экинлари экилиши назарда тутилган ер майдонларига фермер хўжаликлари томонидан юқоридаги қарорлар билан тасдиқланган экин турларини экмасдан, ўзбошимчалик билан шоли экиш мақсадида тайёрланиб келинаётганлиги ҳақида маълумотлар келиб тушган.
Шунга кўра, юқорида келтирилган қарорлар ижросини таъминлаш ва ушбу қарор талабларини бузилишини олдини олиш мақсадида Шовот туман прокуратураси томонидан фермер хўжаликлари раҳбарлари билан профилактик суҳбатлар ўтказилиб, улар қонун ҳужжатлари бузилишини олдини олиш юзасидан расман огоҳлантирилган.
Изоҳ (0)