Ўзбекистон мудофаа вазирининг қурол-аслаҳа ва қуроллантириш бўйича ўринбосари полковник Ойбек Исмоилов бошчилигидаги делегация 15—18 май кунлари Беларусда бўлиб ўтган «Милех—2019» қурол-аслаҳа ва ҳарбий техникаларнинг IX халқаро кўргазмасида ҳамда мудофаа ва хавфсизлик соҳасидаги ҳарбий-техник ҳамкорлик масалалари бўйича VIII халқаро конференцияда иштирок этди. Бу ҳақда вазирлик матбуот хизмати «Дарё»га маълум қилди.
Шунингдек, делегация таркибида Ўзбекистон Мудофаа саноати давлат қўмитаси вакиллари ҳам қатнашган.
Кўргазмада турли давлатларнинг корхоналарида (компанияларида) ишлаб чиқилган ҳарбий маҳсулотлар намойиш этилди. Ташриф давомида Ўзбекистон вакиллари бир қатор давлатларнинг корхоналари (компаниялари) вакиллари билан музокара ўтказди. Хусусан, Ўзбекистон делегацияси Беларуснинг Давлат ҳарбий-саноат қўмитаси раиси Р.Головченко ва Беларусь мудофаа вазирининг қурол-аслаҳа бўйича ўринбосари генерал-майор С.Симоненко билан учрашди.
Музокаралар давомида Ўзбекистон армиясининг муҳандис-техник қўмондонлик таркибига кирувчи ҳарбий хизматчиларни Беларусь Қуролли Кучлари академиясида ўқитиш, икки давлатнинг Мудофаа вазирликлари тизимларида стратегик даражадаги техник таъминотни ташкиллаштириш, шунингдек, бўлинмаларда қурол-аслаҳа ва ҳарбий техникаларнинг қўшин таъмири бўйича келишувларга эришилди.
Изоҳ (0)