Хитой божхона маъмурияти делегацияси Тошкентга келди. Музокараларда Ўзбекистон юк ташувчиларининг Хитойга кириб-чиқишида қулайлик туғдириш муҳокама қилинди

Хитой Бош божхона маъмурияти бошлиғи ўринбосари Ли Го бошчилигидаги делегация 13 май куни Давлат божхона қўмитасида бўлди. Бу ҳақда «Дарё»га қўмита ахборот хизмати бош инспектори Ҳусан Тангриев маълум қилди.

Учрашувда Ўзбекистон чегара-божхона постларини замонавий техник-назорат воситалари, жумладан, катта ҳажмли юк автотранспорт воситаларини сканерловчи инспекцион-кўрик мажмуалари билан жиҳозланишида Хитойнинг иштирокига юқори баҳо берилди. Ҳозирда республика божхона постларида фаолият юритаётган 17 та инспекцион-кўрик мажмуаларининг 8 таси Хитой ҳукуматининг турли грантлари асосида келтирилган.

Учрашувда Ўзбекистон авто юк ташувчиларининг Хитойга кириб-чиқишида қулайликлар туғдириш, ушбу давлат ҳудудида юк ташишда юзага келаётган муаммоларни Халқаро юк ташиш тўғрисидаги Божхона конвенцияси талаблари асосида бартараф этиш масалалари ҳам муҳокама қилинди.

Шунингдек, божхона органлари учун кадрлар тайёрлаш ва ходимларнинг малакасини оширишда икки томонлама ҳамкорлик истиқболлари кўриб чиқилди.

Учрашувдан сўнг меҳмонлар қўмитанинг божхона тарихи музейида бўлди. Ли Го «Фахрий меҳмонлар» китобида дастхатини қолдирди.

Куннинг иккинчи ярмида Хитой божхонаси делегацияси пойтахтдаги «Чуқурсой» ташқи иқтисодий фаолият божхона постида бўлиб, бу ерда ташқи иқтисодий фаолият иштирокчилари учун жорий қилинган қулайликлар, божхона экспертизасининг амалга ошириш жараёни билан яқиндан танишди.

Меҳмонларга 2019 йилнинг 1 мартидан бошлаб амалиётга татбиқ қилинган, юкларни божхона расмийлаштирувидан ўтказишда «яшил», «сариқ», «кўк» ва «қизил» йўлакларга йўналтирувчи автоматлаштирилган хавфни бошқариш тизими ҳақида батафсил ахборотлар берилди.

Делегация пост ҳудудидаги божхона омборларида бўлиб, товарларни омборга жойлаштириш, божхона режимларига йўналтириш жараёнлари билан ҳам танишди.

Ташриф доирасида меҳмонлар Сирдарё эркин иқтисодий зонаси ҳудудида жойлашган «Пенг-Шенг» қўшма корхонасида ҳам бўлди. Хитойнинг Ўзбекистондаги энг йирик лойиҳаларидан бири бўлган ушбу корхонага 2009 йилда асос солинган бўлиб, унинг муассислигида Сирдарё туманида бир нечта ихтисослаштирилган қўшма корхоналар ташкил этилган. Уларда 1500 дан ортиқ иш ўринлари яратилган.

Меҳмонлар лойиҳа таркибидаги керамика кафелларини ишлаб чиқариш корхонаси ва иссиқхоналар фаолияти билан яқиндан танишди. Бу ерда ишлаб чиқарилаётган маҳсулотлар нафақат ички бозор, балки экспортга ҳам йўналтирилмоқда.