Халқаро геологлар жамоаси Хиросима кўрфази соҳилларида ўзгача тоғ жинсларини топди, деб ёзади «Лига Новости». Дастлаб олимларни ушбу тоғ жинсларининг тузилиши астероид ёки каттароқ метеорит қулаши оқибатида ҳосил бўлувчи жинсларникига ўхшашлиги ҳайрон қолдирган. Аммо кейинроқ бу 1945 йилги ядро бомбардимонидан сўнг эриган модда зарралари экани маълум бўлди.
Бундай зарралар миқдори шаҳарга яқинлашган сари ортиб борган, ундан 30 километр узоқликда эса бутунлай йўқолган.
«Аниқланган зарралар жуда ўзгача, ‘аэродинамик’ шаклли, шишасимон тузилишда эди. Бунинг нима эканлигини тушуниб етганимизда ўзимизга савол бердик: агар бу ерда юз йиллаб турган шаҳар бир зумда Ер юзидан йўқолган бўлса, унинг материяси қаерга йўқолди?» — деб ёзади олимлар.
Топилма геокимёвий таҳлилдан ўтказилган.
Гранулалар таркиби пўлат, бетон, органика, алюмин ва бошқа материаллардан, яъни шаҳар қурилган барча нарсалар бирикмасидан иборат эди. Буларнинг барчаси Цельсий бўйича 1800 даража иссиқ ҳароратда бир лаҳзада парчаланиб, «ядро қўзиқорини» бўлиб атмосферага кўтарилган. Шундан сўнг округга турли шакллардаги шиша гранулалар кўринишида сочилган.
Олимлар ноёб жисмга «хирошимит» деб ном қўйди. Уларнинг фикрига кўра, худди шундай зарраларни ядро бомбардимонига учраган Нагасаки яқинида ва ядровий синов майдонларидан ҳам топиш мумкин.
Изоҳ (0)