Инновацион ривожланиш вазирлиги, Исроилнинг Watergen компанияси ва Холон технологиялар институти ҳамкорлигида 14 май куни Бухоро шаҳрида «Gen-350» ҳаво-сув генератори ўрнатилди. Бу ҳақда «Дарё»га вазирлик матбуот хизмати маълум қилди.
Ҳаво намлигидан фойдаланган ҳолда тоза ичимлик сувини ҳосил қилувчи мазкур қурилма суткада ўртача 900 литргача тоза сув ишлаб чиқаради. Watergen технологияси асосидаги қурилмалар дунёдаги энг кам энергия сарфловчи ҳаво-сув генераторлари бўлиб, кам қувват истеъмоли билан кўпроқ сув ҳосил қилиш имконини беради. Қурилма, шунингдек, бир нечта тўсиқли фильтр каскадлар ёрдамида ҳавони фильтрлайди.
Чўл ҳудудларида сувга бўлган эҳтиёжни қондириш, биологик тизимни мувозанатга келтириш, ўсимлик ва ҳайвонот дунёсини сув билан таъминлаш мақсадида ҳаводан сув олиш лойиҳасини амалда синаш республика учун ўта муҳим саналади. Ушбу қурилма Инновацион ривожланиш вазирлиги бошчилигида тажриба тариқасида синовдан ўтказиш учун илк бор Бухоро шаҳрида ўрнатилди.
Инновацион ривожланиш вазири Иброҳим Абдураҳмонов Исроил делегацияси билан учрашуви давомида ушбу лойиҳа муваффақиятли амалга оширилган тақдирда 2 ойдан сўнг Қорақалпоғистоннинг Мўйноқ туманида ҳам қурилмани амалиётга татбиқ этиш масалаларини муҳокама қилди. Вазир, шунингдек, келгусида ҳар бир хонадон учун мўлжалланган ҳаво намлигидан фойдаланган ҳолда тоза ичимлик сувини ҳосил қилувчи кичик ҳажмдаги ҳаво-сув генератори қурилмаларини ишлаб чиқишни йўлга қўйиш бўйича амалий таклифлар берди.
Изоҳ (0)