Фарғона вилоятида Ўзбекистон Президентининг шу йил 23 апрелдаги «Иккинчи жаҳон уруши қатнашчиларини рағбатлантириш тўғрисида»ги фармонига мувофиқ, уруш қатнашчилари ва фахрийларига алоҳида ҳурмат кўрсатилмоқда. Бу ҳақда «Дарё» мухбири Азизжон Эрматов хабар берди.
Уларнинг ҳар бирига тиббиёт ходимлари бириктирилиб, доимий патронаж хизмати кўрсатилмоқда. Санаторийларга бепул йўлланмалар ажратилмоқда.
Хотира ва қадрлаш куни муносабати билан вилоятда истиқомат қилаётган 84 нафар Иккинчи жаҳон уруши қатнашчисига Президент Шавкат Мирзиёевнинг табрикномаси, 7,5 миллион сўмдан пул мукофоти ва қимматбаҳо совғалар тантанали равишда топширилди.
Ана шундай тадбирлардан бири Марғилон шаҳридаги Алишер Навоий маҳалла фуқаролар йиғинида яшовчи, Иккинчи жаҳон уруши қатнашчиси Жамол ота Жалилов хонадонида бўлиб ўтди. Вилоят ҳокими Шуҳрат Ғаниев Президент табригини ўқиб эшиттирди. 7 миллион 500 минг сўм пул мукофоти ва вилоят ҳокимлигининг эсдалик совғаларини тантанали равишда топширди.
Иккинчи жаҳон уруши қатнашчиси, 94 ёшли Содиқжон Мамаюсупов Учкўприк туманининг Дона қишлоғида яшайди. Беш яшарлигида оиласи билан Украинага сургун қилинган. 17 ёшида жангга кириб, икки марта ярадор бўлган. Унга ҳам Президент фармонига асосан пул мукофоти ва қимматбаҳо совғалар берилди.
«Шавкат Мирзиёевнинг Фарғонага ташрифи вақтида Икккинчи жаҳон уруши қаташчилари билан қилган самимий мулоқотини кўриб, қувондим. Кеча ўзим ҳам байрам тадбирида қатнашдим. Ёшларга уруш хотиралари ҳақида гапириб бердим. Байрам арафасида туман ҳокими уйимизга келиб, Президент табрикномаси ва пул мукофотини топшириб кетди», – дейди Содиқжон Мамаюсупов.
Изоҳ (0)