7 май куни Қашқадарё вилояти Деҳқонобод туманида янги барпо этилган «Мотамсаро она» ҳайкалининг тантанали очилиш маросими бўлиб ўтди. Бу ҳақда Мудофаа вазирлиги матбуот хизмати «Дарё»га хабар берди.
Маросимда Қашқадарё вилояти ҳокими Зафар Рўзиев, Жануби-ғарбий махсус ҳарбий округи қўшинлари қўмондонлиги ҳамда вилоят Ёшлар иттифоқи кенгаши вакиллари иштирок этди. Тадбир кўтаринки руҳда ўтказилиб, уруш фахрийларига юксак эҳтиром кўрсатилди.
Сўзга чиққанлар бутун дунёда миллионлаб инсонлар ҳалок бўлишига сабаб бўлган, мислсиз йўқотишлар, талафот ва мусибатлар олиб келган Иккинчи жаҳон уруши инсоният тарихидаги энг даҳшатли, энг қонли қирғин бўлганини, машъум урушда ярим миллиондан зиёд ўзбекистонлик ҳалок бўлганини халқ ҳеч қачон ёдидан чиқармаслигини таъкидлади.
Қарши гарнизони ҳарбий оркестри томонидан ижро этилган куй-қўшиқлар барчани рақсга тушишга мажбур этган бўлса, уруш даврига оид саҳна кўринишлари кўпчиликнинг кўзига ёш келтирди.
Тадбир давомида Иккинчи жаҳон уруши қатнашчиларига Ўзбекистон Президенти номидан совғалар топширилди.
Изоҳ (0)