Андижон вилоятида жорий йилнинг биринчи чорагида 1 минг 56 оиланинг никоҳи бекор қилинган. Бу ҳақда ЎзА хабар берди.
Бу кўрсаткич ўтган йилнинг шу даврига нисбатан 186 та, яъни 17,6 фоизга кўпдир. Ажралиб кетган оилаларнинг 441 таси ёки 41,7 фоизини 30 ёшгача бўлган ёш оилалар ташкил этади.
Оилавий ажримлар Андижон шаҳри, Улуғнор, Хўжаобод, Бўз, Қўрғонтепа, Пахтаобод туманларида кўп учрайди. Ажримларнинг қарийб 65 фоизи оилавий келишмовчиликлар туфайли юз бермоқда.
Ажримлар сабаблари таҳлил қилинганда маҳаллалардаги Яраштириш комиссиялари етарли даражада иш олиб бормаётгани, оиланинг, ажралаётган оилалардаги фарзандлар тақдирига бефарқ қаралаётгани, ажрашиш бўйича юзаки хулосалар чиқарилаётгани аниқланди.
Фуқаролик ишлари бўйича судлар томонидан оилавий ажралиш бўйича ҳукмлар ўтган йилнинг шу даврига нисбатан 42,8 фоизга ортиб кетган. Натижада биргина ўтган чоракда вилоятдаги ажрашган оилаларнинг 648 нафар фарзанди ота ёки она меҳридан жудо бўлган.
Оилавий ажримлар бўйича ҳукмлар чиқарилишида аёлнинг, вояга етмаган болаларнинг бошпана таъминоти масаласи ҳал этилмасдан қолмоқда. Бу ўз навбатида яна кўплаб муаммоларнинг юзага келишига сабаб бўлмоқда. Аёл вояга етмаган фарзандлари билан сарсон бўлмоқда.
Халқ депутатлари Андижон вилояти кенгашининг навбатдан ташқари сессиясида ана шу масалалар атрофлича муҳокама қилинди. Оилани мустаҳкамлаш, ажримларнинг олдини олиш борасида олиб борилаётган ишлар, мавжуд муаммолар, ажримларнинг сабаблари, унга йўл очиб бераётган омиллар ҳамда мавжуд ҳолат таҳлил этилди.
Сессияни Халқ депутатлари вилоят кенгаши раиси, вилоят ҳокими Ш.Абдураҳмонов олиб борди.
Танқидий, таҳлилий руҳда ўтган сессия ишида туман, шаҳар ҳокимлари, сектор раҳбарлари, ҳокимларнинг ёшлар сиёсати, ижтимоий ривожлантириш ва маънавий-маърифий ишлар, хотин-қизлар бўйича ўринбосарлари, халқ депутатлари шаҳар, туман кенгашлари депутатлари, таълим муассасалари директорлари, профилактика инспекторлари, маҳалла фуқаролар йиғинлари, йиғинлар қошидаги Яраштириш комиссиялари, «Қайноналар кенгаши» жамоатчилик тузилма раислари, хотин-қизлар билан ишлаш ва оилаларда маънавий-аҳлоқий қадриятларни мустаҳкамлаш бўйича мутахассислар, имом-хатиблар, отинойилар иштирок этди.
Вилоятда оилани мустаҳкамлаш, оилавий ажримларнинг олдини олиш борасида амалга оширилаётган ишларга қарамасдан оилавий ажримлар сони ортиб кетгани, оилалар билан боғлиқ кўплаб муаммолар юзага келгани танқид қилинди.
Халқ депутатлари вилоят кенгаши раиси туман, шаҳар ҳокимликлари қошида ҳокимлар раислигида ҳуқуқ-тартибот идоралари ва жамоатчилик вакилларидан иборат Тўй-маросимларни ўтказиш бўйича комиссия тузиш таклифини илгари сурди. Шунингдек, сессияда фуқаролик ишлари бўйича судларга, қатор давлат идоралари раҳбарларига, профилактика инспекторларига, имом-хатиблар, отинойиларга қатъий вазифалар белгиланди. Масъул ва раҳбар шахсларга оилавий ажрим, умуман, оила билан боғлиқ масалаларга алоҳида эътибор қаратиш зарурлиги таъкидланди.
Сессияда оилавий ажримларнинг оғир ва аянчли оқибатлари ҳақида ҳикоя қилувчи фильм намойиш этилди.
Сессияда кўрилган масалалар юзасидан тегишли қарорлар қабул қилинди.
Изоҳ (0)