Жорий йил 12 августда Туркманистоннинг Туркманбоши шаҳридаги «Аваза» миллий туристик зонасида илк бор Каспий иқтисодий форуми ташкил этилади. Бу ҳақда ЎзА хабар берди.
Марказий Осиё иқтисодий ҳаётида эътиборли воқелик сифатида қайд этилаётган мазкур йирик тадбирда Каспийбўйи мамлакатлари қаторида Ўзбекистон делегацияси, шунингдек, халқаро молия институтлари, транспорт, экология соҳаларида фаолият юритувчи халқаро ташкилотлар раҳбарлари иштирок этиши кутилмоқда.
Туркманистоннинг Ўзбекистондаги элчихонасида бўлиб ўтган матбуот анжуманида шу ҳақда сўз юритилди.
Тадбирда биринчи Каспий иқтисодий форумининг ҳамкорликдаги ривожланиш мақсадларига мос келишига эътибор қаратилди. Форум доирасида ўтиши кўзда тутилган тадбирлар ва муҳокама марказидаги масалалар юзасидан маълумотлар берилди.
Каспий иқтисодий форумида халқаро конференция ташкил этилиб, унда иштирокчи давлатлар, халқаро ташкилотлар вакиллари билан қўшма инвестициявий лойиҳалар ва дастурларни амалга ошириш, рақамли иқтисодиёт бўйича ҳамкорлик, қўшма корхоналар ташкил этиш масалалари муҳокама қилинади. Maxсус эркин иқтисодий зоналарни ташкил этиш ва ривожлантириш бўйича ўзаро тажриба алмашиш кўзда тутилган.
Шунингдек, форумда Каспий инновацион технологиялари кўргазмаси, иштирокчи давлатлар вакиллари ўртасида бизнес учрашувлар ҳам ўтказилади.
Изоҳ (0)