Соғлиқни сақлаш вазирлиги ўзбекистонликларга ҳамиша фаол ҳаракатда бўлишни тавсия қилмоқда

Жорий йил 27 апрель куни Соғлиқни сақлаш вазирлиги томонидан Ўзбекистон бўйлаб соғлом турмуш тарзи тарғиботига бағишланган навбатдаги оммавий тадбирлар ташкил этилди. Бу ҳақда «Дарё»га вазирлик матбуот хизмати маълум қилди.

Жумладан, Тошкентдаги «Меҳржон» ҳиёбонида 5 километр масофага фаол юриш ва муассасалараро спорт мусобақалари, жумладан, арқонда сакраш, шахмат, шашка, волейбол, стол тенниси,бадминтон, тўсиқлардан ўтиш эстафетаси ўтказилди.

Соғлиқни сақлаш вазирлиги томонидан ҳар ҳафтада ташкил этилаётган ушбу оммавий тадбирларда қатнашувчиларнинг сони ошиб бораётгани, уларнинг жисмоний фаолликка бўлган қизиқиши ҳар қачонгидан ҳам кучаяётгани эътиборга молик. Бу ҳам бўлса, касалликка эмас, унинг профилактикасига асосий эътибор қаратилаётганининг самарасидир.

Қорақалпоғистон Республикаси, вилоятлар ва Тошкент шаҳрида ташкил этилган ушбу оммавий тадбирларда Соғлиқни сақлаш вазирлиги ходимлари, тиббиёт муассасалари шифокорлари, ҳудудлардаги ҳамкор ташкилотлар вакиллари ҳамда маҳалла фаоллари иштирок этди.