АҚШ президенти Дональд Трамп ўз маъмуриятига фуқаролари АҚШга қонуний йўл билан кириб, виза муддати якунига етганидан кейин ҳам Америкада қолиб кетаётган мамлакатларга нисбатан «аёвсиз чоралар» қабул қилиш режасини ишлаб чиқиш ҳақида кўрсатма берди. Бу ҳақда Forum Daily хабар бермоқда.
USA Today’нинг ёзишича, АҚШ давлат котиби ва Ички хавфсизлик департаменти раҳбари тўрт ой муҳлат ичида виза муддатини ўтказиб юборишнинг олдини олиш чораларини президентга тақдим этиши керак. Ушбу чоралар фуқаролари АҚШда визасининг муддати тугаганидан кейин ҳам кўп қолиб кетаётган мамлакатларни жазолаш, шунингдек, хорижий саёҳатчилардан АҚШга кириш вақтида мамлакатни тарк этаётганида қайтариб бериладиган гаров пулини киритиш талабини жорий этишни назарда тутади.
Pew тақдиқот марказининг 2006 йилги ҳисоб-китобларига кўра, АҚШдаги 11 миллион ноқонуний муҳожирнинг қарийб ярми мамлакатга қонуний визалар билан кирган, бироқ визанинг амал қилиш муддати якунига етганидан кейин ҳам мамлакатда қолишга қарор қилган. Шу йўсинда улар депортация таҳдиди остидаги ноқонуний муҳожирларга айланган.
АҚШ маъмурияти фуқаролари виза тартибини бузаётган мамлакатларни жазоламоқчи экани, ушбу мамлакатлар орасида Ўзбекистон ҳам борлиги ҳақида хабар берилган эди. 2017 йил маълумотларига кўра, АҚШга бизнес ва сайёҳлик визаси билан кирган 10 мингдан зиёд ўзбекистонликларнинг 5,55 фоизи виза муддати тугаганидан кейин ҳам АҚШда қолиб кетган.
Изоҳ (0)