Андижон вилоятини хавфсиз ҳудудга айлантириш дастури доирасида вилоят ички ишлар бошқармаси йўл ҳаракат хавфсизлиги бошқармаси ходимлари томонидан бир қатор ишлар амалга оширилмоқда, дея хабар бермоқда вилоят ЙҲХБ ходими Диёрбек Абдураззоқов.
Вилоят ҳудудидаги таълим муассасалари олдида янгича кўринишдаги, яъни ҳайдовчилар эътиборини янада тортиш мақсадида қизил-оқ рангли пиёдалар ўтиш жойлари жорий этилмоқда. Шунингдек, автомобиль йўллари бўйича жойлашган умумтаълим мактаблари атрофида шу ҳудудда таълим муассасаси борлиги ҳақида огоҳлантирувчи ўқувчи акс эттирилган макетлар ўрнатилди.
Шу билан бир қаторда Ички ишлар вазирлигининг 2018 йил 11 июндаги буйруғига асосан давлат йўл ҳаракати хавфсизлиги хизматига жамоатчилик асосида кўмаклашувчи «Йўл посбони» фаолиятини йўлга қўйиш мақсадида кўнгиллилар гуруҳи шакллантирилиб, номзодлар саралаб олинди ва уларга махсус гувоҳномалар топширилди.
Улар соҳа ходимлари билан биргаликда йўл ҳаракати хавфсизлигини ва йўл-транспорт ҳодисалари профилактикасини таъминлашда, шунингдек, йўл ҳаракати иштирокчилари ўртасида, таълим муассасалари, автокорхоналар ва маҳаллаларда Йўл ҳаракати қоидалари асосларини тушунтириш ҳамда уларга риоя қилиш зарурлиги ҳақида тарғибот-ташвиқот тадбирларини олиб бормоқда.
Изоҳ (0)