КХДР янги қуролни синовдан ўтказганини маълум қилди

Шимолий Корея етакчиси Ким Чен Ин тактик бошқарилувчи янги қуролни синовдан ўтказилишига раҳбарлик қилди, деб хабар берди «Ведомости».

Қайд этилишича, янги қурол кучли бош жанговар қурол бўлиши мўлжалланган. Қурол яқинда синовдан ўтказилган, лекин айнан қандай қурол ҳақида гап кетаётгани аниқлаштирилмаган.

Фақатгина Ким Чен Ин синовнинг жуда муҳим ҳодиса эканлигини қайд этгани келтириб ўтилган.

«Тактик бошқарилувчи янги қуролнинг кучини кузатган Ким Чен Ин мамлакат мудофаа қобилиятини мустаҳкамлаш борасида яна бир катта ишни амалга оширган миллий мудофаа соҳасидаги ишчилар ва олимлар ролини таъкидлаб ўтди», — дейилади хабарда.

Шунингдек, КХДР раҳбари мамлакатда ўқ-дорилар ишлаб чиқаришни таъминлаш ва миллий мудофаа илм-фани ва технологиясини илғор даражага олиб чиқиш борасида босқичма-босқич ва стратегик мақсадларни қўйган.

Оқ Уй ва Пентагон бу ҳақда хабардор эканлигини билдирган, лекин бунга батафсил изоҳ беришдан бош тортган.

Хабарда айтилишича, АҚШда Пхеньянда қандай қурол синовдан ўтказилгани ҳақида маълумот йўқ. Шимолий Корея бўйича Марказий разведка бошқармаси собиқ мутахассиси Брюс Клингнер бу ўрта ва узоқ масофага учадиган ракета эмаслигини, улар учрилганда Вашингтон буни осонлик билан қайд этиши, лекин бундай ҳолат кузатилмаганини айтиб ўтган.