Риштон туманида яшовчи, Сўх тумани бандликка кўмаклашиш маркази Давлат меҳнат ҳуқуқи инспектори бўлиб ишлаётган, муқаддам бир неча бор судланган Р.С. яна фирибгарлик, яъни алдаш ва пора беришга далолат қилиш жиноятини содир этди.
2018 йил июль ойида Р.С. М.Э. билан Фарғона шаҳридаги истироҳат боғида танишиб қолган. Ўзаро суҳбат давомида М.Э. фарзандини Бош прокуратура ҳузуридаги мажбурий ижро бюросига ишга кириши учун ҳужжат тайёрлаётганлигини айтади. Р.С. вилоят мажбурий ижро бюросида бошлиқ бўлиб ишлаётган таниши борлиги, ўғлининг ишини тезлаштириб, ҳал қилиб бериши мумкинлигини билдиради. 300 доллар эвазига бир ой ичида ишга жойлаштириб қўйишини айтади.
2018 йилнинг 12 июль куни М.Э. Р.С.га телефон қилиб, 300 долларни Риштон туманида яшовчи опасидан бериб юборишини айтади. Белгиланган вақтда учрашув жойи – Риштон тумани автошоҳбекати орқа томонида Р.С. порани қўлга киритади. Аммо ҳеч қанча вақт ўтмай ҳуқуқ-тартибот идоралари ходимлари томонидан қўлга олинади.
У ўз айбига иқрор бўлиб, М.Э.ни алдаб, ўғлини танишлари орқали ишга олиб кириб қўйиш учун 300 доллар миқдорида пул олиб қарзларига тўламоқчи бўлгани, қилмишидан пушаймонлигини айтиб, енгиллик беришни сўраб кўрсатма берди.
Р.С.нинг қилмиши жиноят ишлари бўйича Риштон туман суди томонидан очиқ сайёр суд мажлисида кўриб чиқилди.
Унга нисбатан Жиноят Кодексининг тегишли моддаларига асосан энг кам ойлик иш ҳақининг 60 баравари миқдорида, яъни 10 миллион 334 минг 400 сўм жарима жазоси тайинланди.
Изоҳ (0)