Адлия вазирлиги: Ҳокимлик томонидан бузилаётган уйлар учун берилаётган кафолат хатлари қонуний кучга эга эмас

Ҳокимлик томонидан хусусийлаштирилган уйларнинг (кўп қаватли хонадонларнинг) давлат эҳтиёжлари учун бузишда бериладиган кафолат хатлари ноқонуний, дея маълум қилинади Адлия вазирлиги ҳужжатида.

Маълум қилинишича, бузилган уйлар бўйича компенсация пуллари ва бошқа харажатлар Уй-жой кодески ҳамда Президентнинг 1 август 2018 йилда қабул қилинган ПФ-5495 «Ўзбекистон Республикасида инвестиция муҳитини тубдан яхшилаш чора-тадбирлари тўғрисида»ги фармонига асосан амалга оширилади.

Мазкур қонун-ҳужжатларида ер участкаларини олиб қўйишда жисмоний ва юридик шахсларга тегишли бўлган турар жой ва ишлаб чиқариш бинолари, бошқа иморатлар ва иншоотларнинг бузилишига кўчмас мулкнинг бозор қиймати ва олиб қўйиш сабабли мулкдорга етказилган зарарнинг ўрни тўлиқ қопланганидан кейин рухсат берилиши кўзда тутилган.

Шунингдек, 1 сентябрдан эътиборан давлат ва жамоат эҳтиёжлари учун ер участкаларини олиб қўйиш тўғрисида қарор қабул қилишга фақат ер участкаси олиб қўйилиши режалаштирилаётган манфаатдор шахслар билан очиқ муҳокама ўтказилганидан, шунингдек, фойда ва харажатлар баҳоланганидан кейин йўл қўйилиши кўрсатилган.

Шаҳар ҳокими томонидан берилган кафолат хати, аҳолига тегишли бўлган турар жой бинолари давлат ва жамоат эҳтиёжлари учун ер участкаларини олиб қўйиш қонунда кўз тутилмаган.

Бундан ташқари, Адлия вазирлиги томонидан берилган расмий жавобда, кафолат хати билан фуқарога берилган уй-жой унинг тасарруфига ўтиши белгиланмаган.