Адлия вазирлиги ҳузуридаги Давлат хизматлари агентлиги авторақамлар беришнинг соддалаштирилган ва коррупциясиз механизмини таклиф этмоқда. Ҳужжат лойиҳаси Норматив-ҳуқуқий ҳужжатлар лойиҳаси муҳокамаси сайтига жойлаштирилди. Бу ҳақда «Дарё»га Давлат хизматлари агентлиги матбуот хизмати хабар берди.
Таклиф этилаётган лойиҳага кўра, автомототранспорт воситаларини давлат рўйхатидан ўтказиш ва авторақам бериш хизмати тажриба тариқасида Давлат хизматлари марказлари орқали кўрсатилади.
Бунда, марказлар орқали қуйидаги тоифадаги автотранспорт воситалари рўйхатдан ўтказилиши режалаштирилмоқда:
- Ўзбекистонда ишлаб чиқилган ва хориждан келтирилган янги автомототранспорт воситалари;
- нотариал олди-сотди шартномаси асосида мулкдори ўзгарган иккиламчи автотранспорт воситалари.
«Лойиҳа аҳолини қийнаётган асосий икки муаммо – бюрократия ва коррупцияни истисно этишга қаратилганлиги билан аҳамиятлидир», – дейилади ҳужжатда.
Автотранспорт воситасини давлат рўйхатидан ўтказишда автотранспорт воситаларини кўздан кечириш, техник кўрикдан ўтказиш талаб этилмайди. Шунигдек, хориждан келтирилган янги автотранспорт воситалари ҳақидаги маълумотлар (декларация ҳужжатлари) ҳам божхона органлари томонидан электрон тизимга киритилиб борилади, уларни тизим орқали текшириш имконияти яратилган.
Давлат хизматлари марказлари автотранспорт воситаларини давлат рўйхатидан ўтказишда махсус электрон тизим орқали автосалонлар томонидан берилган счёт–справкалар ҳамда божхона органлари томонидан берилган божхона декларацияси маълумотларга асосланган ҳолда автотранспорт воситасини кўздан кечирмасдан рўйхатдан ўтказади.
Иккиламчи бозордаги автотранспорт воситалари
Уларни ҳам қайта расмийлаштиришда– техник ёки бошқа тарздаги кўриклардан ўтказиш талаб этилмайди. Эски автотранспортлар нотариуслар томонидан бошқа шахс номига олди-сотди шартномалари асосида ўтказилгунга қадар шундоқ ҳам ички ишлар органлари томонидан агрегатлар рақамлари рўйхатдан ўтказиш рақамларига мувофиқлиги юзасидан кўздан кечирилади. Нотариус ички ишлар органинининг ушбу маълумотномасига асосланган ҳолда олди-сотди шартномаларини тасдиқлайди.
Давлат хизматлари марказлари иккиламчи бозордаги автотранспортни–нотариал шартномани электрон тизимдан текширган ҳолда ҳеч қандай кўрикдан ўтказмаган ҳолда амалга оширади.
Авторақамлар сотишда коррупцияга чек қўйиш ҳақида
Эндиликда авторақамлар коррупциянинг олдини олиш мақсадида махсус электрон тизим орқали инсон омилининг аралашувисиз тўлиқ автоматик тарзда танлаш орқали тақдим этилади. Ҳар бир рўйхатдан ўтказилган рақамлар Марказ биносидаги йирик интерактив экранда очиқ кўринишда акс эттирилади ва реал вақт режимида янгиланиб борилади.
Худди шунингдек, аукцион орқали бериладиган авторақамлар тоифасига кирмайдиган айрим харидоргир рақамларни (жумладан, «кўзгу» шаклидаги, масалан 212, 313, 717 ва ҳоказо) орттирилган ставкада тақдим этиш назарда тутилмоқда. Бунда ҳам коррупцион хавфни нол даражагача камайтириш мақсадида ушбу тоифадаги рақамлар ҳам қўшимча тўлов эвазига автоматик тарзда электрон тизим орқали танлаш йўли билан амалга оширилади.
Фуқаро харидоргир рақам учун энг кам ойлик иш ҳақининг 1 баравари миқдоридаги қўшимча тўлов амалга оширса, унга 1X1 – 9Х9 тоифадаги кўзгусимон рақамлардан (жами 72 та) бири инсон омилининг аралашувисиз электрон тизим орқали танлаб берилади.
Изоҳ (0)