Такси ёки хусусий ҳайдовчиларни қидириш, чақиртириш ёки буюртма қилинган овқатларни етказиб бериш учун шу номдаги дастур яратган Американинг Uber халқаро хусусий компанияси IPO’га чиқишга тайёрланмоқда. Бу ҳақда Spot хабар берди.
Бизнес моделнинг ёрқин намоёндаларидан бўлган ушбу компания 120 миллиард долларга баҳоланган. Uber компанияси жорий йилдаги ва ҳатто тарихдаги энг йирик IPO номига давогарлик қилиши мумкин.
Хабарда ёзилишича, компания аввал айтилмаган маълумотлар, хусусан, Yandex.Taxi билан ҳамкорлиги ҳақидаги маълумотларни ошкор қилишни бошлаган.
Uber ва Yandex.Taxi Россия ва МДҲда 2018 йилнинг февраль ойи бошларида бирлашган. Яндех ҳамкорликдаги ташкилотнинг 59,3 фоиз акциясига, Uber —36,9 фоиз, янги тузилма ходимлари эса 3,8 фоизига эга бўлган. Uber янги компанияга 225 миллион доллар миқдорида инвестиция киритган, Yandex эса 100 миллион доллар.
Uber ва Yandex.Taxi ишлайдиган мамлакатларда иккала дастур ҳам ишлашда давом этган. Бирлашиш ҳар икки компания хизматлари сифатини яхшилаш учун керак бўлган.
Ўзбекистонда бундай келишув тузилганда Uber ҳам, Yandex.Taxi ҳам бўлмаган. 2018 йилда ўзбек бозорига Yandex.Taxi кириб келганида бу Uber ва Yandex.Taxi бирлашмаси бўлган.
Uber томонидан чоп этилган маълумотларга кўра, компания 2021 йилгача Яндех розилигисиз ҳамкорликдаги ташкилотнинг бир қисмини сотиш ҳуқуқига эга эмас. Бундан ташқари, 2025 йилнинг февралига қадар Uber’га Россия ва МДҲда унинг ҳамкор ташкилоти Yandex.Taxi билан рақобатлашиш тақиқланган.
Изоҳ (0)