«Дарё»да Қашқадарё вилоятининг Ғузор туманидаги 21-умумтаълим мактабининг шийпонда жойлашган филиали ҳақида «Қашқадарёда 1972 йилда қурилган шийпон мактабда ўқиётган ўқувчилар илон ёки чаён чақишидан чўчимоқда» сарлавҳали мақола чоп этилган эди. Мазкур мақолага муносабат билдирган Ғузор туман халқ таълими бўлими мақоладан сўнг қилинган ишлар ҳақида ҳам маълумот берди.
— Мақола чоп этилгач, туман халқ таълими бўлими ходимлари филиалда бўлишиб, ҳолатни ўрганишди, — дейди Ғузор туман ХТБ мудири ўринбосари Шокир Пардаев. – Ҳақиқатдан ҳам филиалда аҳвол жуда ёмон эди. Шу боисдан ҳам филиалда таҳсил олувчи 41 нафар ўқувчи 21-мактабнинг асосий биносига кўчирилди.
Халқ таълими бўлими мудири ўринбосари Шокир Пардаев ва 21-мактаб директори Нигора Шерназарованинг айтишича, асосий бинога қатновчи филиал ўқувчилари учун автобус ҳам ажратиб берилган.
— Ўқувчилар асосий бино ва филиал ўртасидаги 2–3 километрлик масофадан келиб кетишда қийналиб қолмасликлари учун автобус ҳам ажратиб берилди, — дейди 21-мактаб директори Нигора Шерназарова. – Филиал учун эса ҳудуддан 120 ўринли янги мактаб қурилиши бошланди.
Нигора Шерназаровага кўра, 1 миллиард 18 миллион сўм маблағ эвазига қурилиши бошланган янги мактаб биносида спорт зали ва болалар майдончаси ҳам бўлади.
Маълум бўлишича, «Нишон бунёдкори» МЧЖ қурилиш ташкилоти қурувчилари томонидан 2019 йил 25 мартдан бошланган қурилиш ишлари 2019 йил август ойида якунланади.
Изоҳ (0)