Легионерлар, жангга! АПЛ тарихидаги энг яхши чет эллик ҳужумчилар ҳақида

Англия премьер лигаси нафақат томошабоплиги билан, балки ўзининг тиним-билмас жангчи-футболчилари билан ҳам мухлисларни доимо ўзига қаратиб келади. Қуйида майдондаги энг қувноқ позициялардан бири бўлган — ҳужум чизиғида қачонлардир тўп сурган ва айни дамда ҳам фаолиятини давом эттираётган чет эллик энг яхши ҳужумчилар ҳақида сўз юритилади.

5. Дидье Дрогба

Рўйхатнинг бешинчи ўрнидан инглиз футболи тарихида ўчмас из қолдирган «Челси» ҳужумчиси Дидье Дрогба ўрин эгаллаган. Африкалик футболчи Лондон клубига икки бор келишига тўғри келган. Аммо биз унинг жамоага бўлган биринчи ташрифи ҳақида эслаймиз. Ахир у Туманли Альбионга биринчи сафари давомида 254 та ўйин ўтказиб, 104 та гол урганди. Қайд этиш жоиз, Дрогба ўз вақтида кўплаб ўйинларни 1:0, 2:0 каби ҳисобларда ютадиган Жозе Моуриньо қўл остида тўп сурган. Бироқ ҳеч бир жиҳат унинг АПЛда 54 та голли узатмани ҳам амалга оширишига ҳалал бера олмаган. Дрогбанинг бош билан ўйнашига эса шунчаки гап йўқ эди. У бу қобилияти билан 17 та гол урганди. Унинг ёрдамида «Челси» Англияда 4 бор чемпион деган номга мушарраф бўлди. Дрогба эса 2 бор «Олтин бутса» совринини ҳам қўлга киритди. Дидье Лондон клуби мухлислари ёдида нафақат ўзининг ўйинлар ва голлари, шунингдек, ўзига хос метин характери ва жамоадошларини руҳлантира олиши билан ҳам қоладиган бўлди.

4. Дэннис Бергкмап

Кўпчиликнинг фикрига кўра, Дэннис инглиз футболида револуция қила олган футболчилардан бир эди. Британияликлар қаттиққўл ва консервативлиги билан ажралиб турган. Аммо ҳаммаси «учмас ҳолланд» инглиз диёрига ташриф буюриши билан ўзгариб кетди. У ҳужумчидан ҳам кўпроқ плеймейкерга ўхшарди. У «тўпчилар» сафида 315 та ўйинда 87 та гол урди. Бергкамп 4 бора Англияда ойнинг энг яхши футболчиси деб топилди. Айнан у билан «Арсенал» инглиз футболи тарихидаги энг яхши ўйинларини намойиш этди. Нидерландиялик сабаб Арсен Венгер жамоаси Англияда 3 бор чемпионликка эга чиқди. У бунга нафақат голлари, балки ўзининг заргарона паслари орқали амалга оширилган 94 та голли узатмаси билан ҳам ҳисса қўшгани билан ёдда қолди. Дэнниснинг узатмалари ўзгача траекторияга эга бўлганлиги ҳақида жамоадошлари ҳам кўп бора таъкидлаб ўтган. Ўзининг такрорланмас ҳаракатлари билан ҳам Дэннис ушбу рўйхатга киришга 100 фоиз ҳақли.

3. Эрик Кантона

«Манчестер Юнайтед»нинг мамлакатда етакчи жамоа ролига чиқишида «Қирол Эрик»нинг хизматлари беқиёс. Бергкамп «Арсенал»ни қандай ўзгартирган бўлса, худди шундай ишни «Манчестер»да Кантона амалга оширди. Унинг такроланмас ўйин услуби ва шахси жамоадошларини ғалаба йўлида руҳлантира олган. Унинг жамоа келиб қўшилиши билан ҳамма нарса, ҳаттоки машғулотлар ҳам ўзгаради. Француз ўзи ишлаган жарималарни ўзи амалга оширарди. Унинг ишга бўлган муносабати эса ака-ука Невиллар ва Райан Гиггзга каттагина таъсир кўрсатди. Сэр Алекс Фергюсон «Лидс» юлдузини сотиб олиб, инглиз футболи учун рекорд қўйганди (1992 йил, 1,2 млн фунт эвазига). Шу билан бирга шотландиялик мутахассис катта таваккалга ҳам қўл урганди. Мухлисга қилган ҳужуми боис 10 ойлик дисквалификацияни ўтаган Кантона харидидан кейинчалик ҳеч ким афсусланмагани бор гап. Эрик «Юнайтед» сафида 156 та ўйинда 70 та гол уриб қўйди. Бундан ташқари 56 та голли узатма ҳам торт устига олча мисоли ярашиб турарди. «Юнайтед» Кантона билан 5 мавсум ичида 4 карра мамлакат чемпионлигини қўлга киритди. Ва ҳақли тарзда ушбу рўйхатдан ўрин олди.

2. Серхио Агуэро

Ушбу рўйхатдаги бошқа ўйинчилар каби Серхио Агуэро ҳам ўз жамоаси — «Манчестер Сити»ни етарлича кучайтира олди. Агуэро нафақат индивидуал жиҳатдан кучли, балки Кантона сингари жамоадошларини руҳлантира олиш қобилиятига ҳам эгалиги билан ажралиб турарди. У жамоанинг янги даражага чиқишида катта хизмат қилиб келмоқда. Ҳозир эса ҳеч бир муболағасиз Агуэрони лига тарихидаги энг яхши Жанубий америкалик деб атаса бўлади. Хавфли ҳужумчи, ақлли етакчи ва иқтидорли «якунловчи» — буларнинг барчаси Агуэрога берилган таърифлар. Серхио «Сити»да исталган мураббий билан тез тил топишиб кета олди. Ҳозир ҳам Пеп Гвардиола қўл остида ажойиб ўйин ва сермаҳсуллик намойиш этмоқда. Статистика эса сўзларимизга яққол исбот: 232 та ўйин, 161 та гол. Агуэро 2015 йилда «Олтин бутса»ни ютиша эришди. Уч марта эса Англия чемпионлигини қўлга киритди. Аргентиналик нафақат голлар уриб, балки 41 та голли узатмаси билан ҳам шерикларига катта ёрдам беришда давом этмоқда. «Манчестер Сити» тарихидаги энг муҳим голлардан бирини (агар энг муҳими бўлмаса) ҳам Серхио Агуэро урганди. У 2011/12 йилги мавсумнинг сўнгги ўйинининг охирги дақиқаларида чемпионлик голини уриб, жамоа мухлисларига олам-олам завқ улашганди.

1. Тьерри Анри

Англия премьер лигаси ҳақида гапирар эканмиз, дарҳол Анри ҳақида ўйлаб қоламиз. Буюк ҳужумчи, ҳар қайси қанотда ўйнаса ҳам фойдали эди. Анри — майдондаги ҳақиқий санъат асари. Уни кўрганда, ҳатто футболни унчалик тушунмайдиган инсон ҳам кўз олдида буюк атлет турганлигини англаши қийин бўлмасди. Тьерри нафақат ажойиб техника, балки сермаҳсуллиги билан ҳам мусобақа тарихидаги энг яхши легионер ҳужумчи номига муносиблигини исботлаган. 258 та ўйинда 175 та гол. 2002 ва 2004 йилда қўлга киритилган иккита чемпионлик унвони, 4 та «Олтин бутса» ҳамда 2 бор мавсумнинг энг яхши ўйинчиси совринлари Анрининг қай даражада ўйин кўрсатганлигига яққол далил. Француз гол уришдан ташқари яхшигина ассистант ҳам эди. Унинг ҳисобида 74 та голли узатма ҳам борлиги ҳам факт. Ўз даврининг энг яхши ҳужумчиларидан бири сўзсиз «Арсенал» ва инглиз футболида муносиб из қолдира олди.

Sportskeeda’дан Асрор Абдуназаров таржимаси