Шавкат Мирзиёевнинг Бирлашган Араб Амирликларига расмий ташрифининг асосий тадбирлари бошланди. Бу ҳақда Президент матбуот хизмати маълум қилди.
Давлат раҳбари, таомилга кўра, дастлаб Абу-Даби шаҳридаги Шайх Зайд бин Султон Ол Наҳаён мақбараси ҳамда масжидини зиёрат қилди.
Шайх Зайд бин Султон Ол Наҳаён Бирлашган Араб Амирликларининг биринчи президенти бўлган. У 2004-йили ўзи қурдирган мазкур масжид ёнида дафн этилган. Бугунги кунда ушбу масжид ва мақбара мамлакат аҳолиси учун табаррук масканга, хорижий делегациялар раҳбарлари ташриф буюрадиган мажмуага айланган.
Бу масжид дунёдаги энг катта масжидлардан бири бўлиб, қурилиш ишлари 1996-йилдан 2007-йилгача давом этган. Унда бир вақтнинг ўзида 40 минг киши намоз ўқиши мумкин.
Мажмуага ташриф асносида Шайх Зайд бин Султон Ол Наҳаён руҳига Қуръон тиловат қилинди.
Президентга масжиднинг қурилиш тарихи, ўзига хос хусусиятлари, сайёҳлар ва зиёратчилар учун яратилган шароитлар ҳақида сўзлаб берилди.
Шавкат Мирзиёев мақбаранинг Зиёратчилар китобида дастхат қолдирди.
Давлат раҳбари «Ваҳат ал-Карама» ёдгорлигига гулчамбар қўйди.
«Қадр-қиммат воҳаси» маъносини англатувчи ушбу мемориал Бирлашган Араб Амирликлари озодлиги ва бирдамлиги учун қурбон бўлганлар шарафига бунёд этилган. Ёдгорлик бир-бирига таяниб турган 31 блокдан иборат бўлиб, раҳбарлар, ҳарбийлар ва фуқаролар ўртасидаги ўзаро ҳамжиҳатлик ва қўллаб-қувватлаш рамзи ҳисобланади.
Давлат раҳбари ёдгорликнинг Фахрий меҳмонлар китобига дастхат қолдирди.
Изоҳ (0)