Қашқадарё вилояти, Қамаши туманининг «Бойбўри» маҳалла фуқаролар йиғини «Бойбўри» қишлоғида 125 йиллик 10 туп чинор дарахти кесиб кетилгани айтилмоқда. Бу ҳақда Қамаши туманининг «Бойбўри» қишлоғида яшовчи аҳоли вакиллари берган маълумотга таяниб, «Дарё» мухбири маълум қилмоқда. Аҳолининг айтишича, чинорларни водий вилоятларидан келган 2 та «Фура» юк машинасига ортиб кетишган.
— Тушдан сўнг 15:00 да чинорларни кесишни бошлашиб, ярим кечаси соат 3-4 да юкларни ортиб олиб кетишди, — дейди мурожаатчи «Дарё» мухбири билан мулоқотда. – Мен ўша куни туман ҳокимининг шахсан ўзига телефон қилиб бу ҳақда хабар бердим. Аммо эътиборсиз қолдиришди.
Мурожаатчининг маълумот беришича, чинорларни 15 март куни кесишган. Чинорлар диаметри 160–170 сантиметрни ташкил қилгани айтилмоқда.
— Чинорларни бундан 3 кун олдин (Мурожаатчи билан 18 март куни суҳбатлашилган) кесиб кетишди, — дейди мурожаатчи. — Улардан нима учун дарахтларни кесишаётганини сўраганимизда, ҳаммаси қонуний ҳал этилганини айтишдию, аммо дарахтларни кесишга рухсат берилган рухсатномасини кўрсатишолмади. Агарда қонуний бўлса, қаерга ва қанча маблағ ўтказишганини сўрадик. Жавоб беришмади.
Аҳоли вакилларининг билдиришича, чинорлар кесилаётганлиги ҳақидаги хабарга туман ҳокими бефарқ қарагач, аҳоли Президент порталига ҳам мурожаат қилган.
— Туман ҳокимлиги эътибор бермагач, порталга ҳам мурожаат қилдик, — дейди суҳбатдошлар. – Мурожаатимизга мувофиқ 18 март куни вилоят экологиядан 3 нафар вакил келиб кетди. Ўрганишди, далолатнома ҳам тузишди. «Дарахтларни ноқонуний кесишган бўлса, жавобгарликка тортамиз», – дейишди.
Ҳолат ҳақида хабар топгач, масалага ойдинлик киритиш мақсадида вилоят экология ва атроф муҳитни муҳофаза қилиш бошқармаси билан боғландик. Масъуллар «Бойбўри» қишлоғида ҳақиқатдан ҳам чинорлар кесиб кетилганлигини тасдиқлади, аммо кесилган чинорлар 10 туп эмас, 9 туп эканлигини айтишди.
— Президент порталига қилинган мурожаат бўйича 18 март куни Қамаши туманининг Бойбўри қишлоғида бўлдик, — дейди вилоят экология ва атроф-муҳитни муҳофаза қилиш бошқармаси масъули Азизбек Қурбонов. – Ҳақиқатдан ҳам йўл бўйидаги 9 туп кўп йиллик чинор бундан 3 кун илгари кесиб кетилганлиги аниқланди. Лекин ким, нима мақсадда кесиб кетгани ҳали номаълум.
Мутахассис фикрига кўра, чинор дарахти танасининг қалинлиги дарахт ёшидан дарак берар экан. Азизбек Қурбонов аҳоли вакилларининг чинор дарахтлари танаси диаметри 160–170 сантиметрни ташкил қилар экан деган гапларини тасдиқлаган бўлса-да, кесилган чинорлар ёши борасида аниқ гап айтолмаслигини билдирди.
Мурожаатчилар юборган расмларда бир неча кесилган дарахтларнинг ўрни акс этган бўлиб, илгари ўрнида қалин чинорлар бўлганлиги кўриниб турибди. Сурат билан бирга тақдим этилган видеода ҳам чинорнинг қулатилганлиги акс этган бўлиб, чинор танаси анча қалинликда эканлиги яққол сезилади.
Бойбўри қишлоғида чинорлар кесилгани ҳақида хабар берган аҳоли вакилларининг қўшимча қилишича, бундан аввалроқ Чимқўрғон томонда ҳам 20 туп чинор кесиб кетилган.
Мурожаатчиларнинг туман ҳокими мурожаатимизга эътибор бермади, деган гапидан келиб чиққан ҳолда, Қамаши туман ҳокими Шерали Санаевнинг бу борадаги фикри билан қизиқдик. Ва туман ҳокимига қўнғироқ қилдик. Ким эканлигимиз ва нима мақсадда телефон қилганимизни билгач, ҳоким тез орада мутахассислар биз билан боғланиши ва бу борада расмий маълумот беришини билдирди.
Бироздан сўнг «Дарё» мухбирига қўнғироқ қилган Қамаши туман экология ва атроф муҳитни муҳафаза қилиш бўлими бошлиғи Насибали Намозов чинорлар ҳақиқатдан ҳам қонуний тартибда кесилганлигини айтиб, 19 март куни соат 9:00 да тегишли ҳужжатларни тақдим этишини билдирди. Аммо айтилган муддатдан 24 соатдан ортиқроқ вақт ўтиб кетган бўлса-да на туман ҳокимлигидан на Насибали Намозовдан дарак бўлди.
Ўйлаймизки, тез орада мутасаддилар очиқ қолаётган саволларга жавоб беришади.
Изоҳ (0)