«Остона» телеканали журналистлари саккиз йил давомида қимор ўйинларида 100 миллион тенгедан ортиқ пул ютқазган йигитдан интервью олди, деб ёзади «Tengrinews».
Дониёр исмли йигит (исми ўзгартирилган) ниқобда интервью беришга рози бўлган. Ўзига тўқ оиладан бўлган йигит 18 ёшидан бошлаб қимор ўйнашни бошлаган. Вақт ўтган сари қиморга кўпроқ пул тикишни бошлаган ва уларнинг барчасини онлайн-казинога сарфлаган. Ойлик иш ҳақининг ҳаммасини қиморга тиккан пайтлари ҳам бўлган.
Йигитнинг айтишича, ўз ҳаётини назорат қила олмай қолган. Ҳатто чет элда дам олаётган пайтида ҳам фақат қимор ҳақида ўйлаган.
Ҳозир йигит 26 ёшда бўлиб, охирги йўқотиши отаси совға қилган машина бўлган. Уни қиморда ютқазган пулларни тўлаш учун сотиб юборган.
«Агар наркоманлар гиёҳванд моддаларга қарам бўлса, мен қимор ўйинидан, ундан оладиган эмоцияларга қарам эдим. Мен худди робот каби эдим, ўзимни бошқара олмасдим. Ўтмишимни эслашни ҳам хоҳламайман. Яқинларимнинг, дўстларимнинг ишончини йўқотдим. Вазият шу даражага бордики, ҳатто рафиқам билан ажрашдим», — дейди йигит.
Хабарда қайд этилишича, Жаҳон соғлиқни сақлаш ташкилоти одамнинг бундай ҳолатини қарамлик деб атайди. Ўтган йилдан бошлаб ўйинларга қарамлик касаллик деб расман тан олинган. Агар одам бир йил давомида бундай қарамликдан халос бўлолмаса, бундай ҳолат руҳий касаллик деб ҳисобланади.
Изоҳ (0)