Ўзбекистон бўйлаб Ёшлар иттифоқи томонидан ташкил этилган «Иттифоқ таълим гранти» лойиҳасига доир ҳудудий комиссия йиғилишлари бўлиб ўтди, деб ёзади ЎзА.
Унда комиссия аъзолари томонидан олий таълим муассасаларида тўлов-шартнома асосида таълим олаётган чин етим (ота-онасиз, ота-оналик ҳуқуқидан маҳрум этилган), имконияти чекланган ҳамда меҳрибонлик уйида тарбияланган, боқувчисини йўқотган талабаларни моддий қўллаб-қувватлаш юзасидан тўлов-шартнома маблағларининг 50 фоизигача бўлган миқдорини тўлаб бериш бўйича мурожаат қилган талабаларнинг ҳужжатлари ўрганиб чиқилди.
Комиссия аъзоларининг якуний хулосаларига кўра, жами 367 нафар номзод орасидан 203 нафар талабанинг ҳужжатлари Ўзбекистон ёшлар иттифоқи марказий кенгашининг республика комиссиясига тавсия этилди. Жумладан, Тошкент шаҳридан 32 нафар, Самарқанд вилоятидан 31 нафар, Сурхондарё вилоятидан 22 нафар, Қорақалпоғистон Республикасидан 20 нафар, Бухоро вилоятидан эса 18 нафар ёшнинг топширган ҳужжатлари ҳудудий комиссия йиғилишидан муваффақиятли ўтди.
Шунингдек, Қашқадарё ва Навоий вилоятларидан 17 нафардан, Фарғона вилоятидан 10 нафар, Жиззах вилоятидан эса 9 нафар, Наманган вилоятидан 8 нафар, Хоразм вилоятидан 7 нафар, Андижон вилоятидан 6 нафар ҳамда Тошкент вилоятидан 4 нафар, Сирдарё вилоятидан 2 нафар иштирокчининг ҳужжатлари ҳам мазкур лойиҳанинг якуний босқичида ўрганилади.
367 талабадан 164 нафарининг ҳужжатлари низом талабларига жавоб бермагани учун Республика комиссиясига тақдим этилмади.
Номзод талабаларнинг ҳужжатлари Республика комиссияси томонидан «Иттифоқ таълим гранти»га лойиқ деб топилса, тўлов-шартнома маблағларининг 50 фоизигача бўлган миқдори жорий йилнинг 20 мартига қадар тўлаб берилади.
«Иттифоқ таълим гранти» лойиҳаси совриндорларини аниқлашда асосий эътибор талабанинг айни вақтдаги ижтимоий-моддий аҳволи, жамоатчилик ишларида фаоллиги ва эришган ютуқларига қаратилди.
Изоҳ (0)