Хива шаҳари яқинида «Хива локомотив» МЧЖга қарашли 3 та замонавий меҳмонхона қад ростламоқда. Бу ҳақда «Ўзтемирйўлйўловчи» АЖ матбуот хизмати хабар берди.
Уларнинг дастлабкиси 74 ўринли бўлиб, 41 та ҳар хил турдаги хоналардан иборат. Бино 2 қаватли бўлиб, ўзида миллий меъморчилик анъаналарини акс эттиради. Сайёҳларга қулай бўлиши учун мазкур бино темир йўл вокзали ёнида бунёд этилган. Ҳозирди бу ерда сўнгги пардозлаш ишлари амалга оширилмоқда.
Навбатдаги меҳмонхоналар Ичан ва Дишан қалъа оралиғида жойлашган бўлиб, 56 ҳамда 84 ўринли. Ушбу иншоотларда сайёҳлар учун барча шарт-шароитлар жаҳон стандарти бўйича жорий этилади. Хусусан, бу ерда ёпиқ турдаги бассейн ва сауна, замонавий ресторан фаолият кўрсатиши режалаштирилган. Энг эътиборли томони шундаки, мазкур меҳмонхоналардан Ичан қалъагача пиёда юриб бориш мумкин, транспортга ҳам ҳожат йўқ.
Бунёдкорлик ишлари якунлангандан сўнг бу ерда 85 та янги иш ўринлари яратилади.
Шунингдек, бу ерда темирйўлчилар томонидан «Хива локомотив» истироҳат боғини барпо этиш ишлари ҳам қизғин давом этмоқда. Боғнинг умумий майдони 10 гектарни ташкил этади. Бу ерда 22 турдаги замонавий аттракционлар ўрнатилади. Ҳудуд кўкаламзорлаштирилиб, 2500 дан ортиқ 14 турдаги манзарали дарахт ва гуллар экилади. Шу билан бирга 3 та мусиқали фаввора ҳам бунёд этилади. Лойиҳа доирасида 500 кишилик амфитеатр ҳамда 0,5 гектар кўл ҳам қурилади.Яқин кунларда дастлабки меҳмонхонани фойдаланишга топшириш режалаштирилган.
Изоҳ (0)