Наманган шаҳрида жойлашган Нодирабегим номидаги ахборот-кутубхона маркази ташкил топганига бу йил 100 йил тўлди. 570 мингдан ортиқ китоб фондига эга ушбу маскан барча ахборот-ресурс марказларига услубий кўмак бериб келмоқда.
Президент Администрацияси ҳузуридаги Ахборот ва оммавий коммуникациялар агентлиги мазкур бино ва у жойлашган ҳуддудни реконструкция қилиш, ахборот-кутубхона марказини тубдан модернизациялаш бўйича кенг қамровли лойиҳа тайёрлаган.
Ушбу лойиҳа асосида эндиликда бу мажмуа:
Мамлакат нашриётларида чоп этилаётган китоблар ва чет эл ёзувчиларининг асарлари билан янада бойитилади;
замонавий телекоммуникациялар ёрдамида масофадан туриб мамлакат ва илғор хорижий давлатлар кутубхоналаридаги ресурслардан фойдаланиш имкони яратилади;
китобхонларга билим ва ахборот олишлари учун шинам шароит яратилади;
ўқув ҳамда анжуманлар заллари кўркам ва бежирим кўринишга эга бўлади.
Бунинг натижасида кутубхона ҳозиргидан икки баробар кўп фойдаланувчига хизмат кўрсата оладиган имкониятга эга бўлади.
Давлат раҳбари мазкур лойиҳа билан танишар экан, уни қўллаб-қувватлашини, уни қисқа муддатда амалга ошириш лозимлигини таъкидлади. Шунингдек, қарийб ярим гектарга тенг майдонда жойлашган кутубхона теварагини китоб мутолаасига қулай осойишта, бўлиши лозимлигини қайд этди.
Изоҳ (0)