Давлат хавфсизлик хизмати Тошкент вилояти бошқармаси ходимлари томонидан ўзбек-тожик давлат чегарасини ноқонуний кесиб ўтган вақтда Тожикистон фуқароси, Сўғд вилояти Мастчох туманида яшовчи Мирзараҳмат Мажидов ушланди. Бу ҳақда ЎзА хабар берди.
Унинг қўл юклари кўздан кечирилганда соф оғирлиги 773 грамм бўлган опий моддаси борлиги аниқланди ва тегишли тартибда расмийлаштирилди.
Шунингдек, Тошкент тумани, «Шодлик» кўчасида яшовчи Шаҳобиддин Зокиров ва унинг онаси Зулфия Набиева ҳам ҳуқуқни муҳофаза қилувчи орган ходимларида шубҳа уйғотди ва дастлаб улар яшайдиган хонадон кузатувга олинди. Видеоназорат хонадон ойнасидан шубҳали нарса улоқтирилганлигини тасвирга туширади. Шундан сўнг текширув ҳаракатлари давом эттирилиб, натижада ушбу улоқтирилган шубҳали нарса ичида салкам 3 килограмм марихуана гиёҳванд моддаси аниқланди ва тегишли тартибда расмийлаштирилади.
Навбатдаги гиёҳванд моддалар савдоси билан боғлиқ ҳолат Давлат хавфсизлик хизмати Қашқадарё вилояти бошқармаси ходимлари томонидан аниқланди. Чироқчи туманида туғилган Ҳамза Бобомирзаев Lacetti автомобилида Тошкент шаҳрига йўл олади. Машина «Умакай» йўл-патруль хизмати масканида кўздан кечирилганида 120 грамм марихуана воситаси борлиги аниқланди. Суриштирув давомида Ҳамза Бобомирзаев уни Тошкент шаҳрига олиб бориб сотмоқчи бўлганлиги маълум бўлди. Тезкор гуруҳ томонидан Ҳамза Бобомирзаевнинг яшаш манзили ҳам кўздан кечирилганда, уйнинг ертўласидан 5 килограмм 294 грамм марихуана гиёҳвандлик воситаси расмийлаштириб олинди.
Давлат хавфсизлик хизмати Фарғона вилояти бошқармаси ходимлари томонидан Ўзбекистон Республикасига контрабанда йўли билан олиб келинган гашиш гиёҳванд моддаси савдосига чек қўйилди.
Бир муддат аввал героин савдоси билан ушланган фуқаро Маъмур Маматқуловнинг кўрсатмасига кўра, қирғизистонлик Ҳайдар исмли шахс гашиш моддасини Ўзбекистонга олиб ўтиб, белгиланган жойга яшириб кетганлиги маълум бўлди. Ўтказилган текширув натижасида Қирғизистонга чегарадош бўлган Қувасой шаҳар, Полвон маҳалласидаги дала шийпони девори остидан қора целлофан пакет ичида 10 дона алоҳида бўлакларда бўлган соф оғирлиги 7 килограмм 662 грамм миқдордаги гашиш гиёҳванд моддаси ашёвий далил сифатида олинди.
Ҳозирда барча ҳолатлар юзасидан ЖКнинг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Изоҳ (0)