АҚШнинг СETI институтининг бир гуруҳ олимлари Нептуннинг 14-йўлдоши мавжудлигини расман исботлади. Тегишли мақола Nature журналида чоп этилган, деб хабар берди «Zakon.kz».
«Хаббл» космик телескопи еттинчи ички ойни аниқлаган бўлиб, у ўртача радиуси 17 километр бўлган бошқа олтитасига нисбатан кичикроқ.
Қайд этилишича, астрономлар йўлдошнинг мавжудлиги ҳақидаги дастлабки изларни 2013 йилда Қуёш тизимидан узоқда жойлашган ва заиф сайёраларни қидириш алгоритмини текшириш вақтида аниқлаган.
Ушбу алгоритм асосида сайёралар ва уларнинг ойлари бир нуқтада қолувчи турғун космик объектлар, масалан юлдузлардан фарқли равишда муайян йўналиш бўйлаб ҳаракатланиб, бир нуқтадан иккинчи нуқтага ўтиши принципи ётади. Ўз навбатида уларнинг ҳаракатини аниқлаш учун бир осмон жисмининг турли вақтларда олинган бир неча суратларини таққослаш керак бўлади.
Топилмага С/2004 Н 1 деб ном берилган бўлиб, унинг мавжудлигини исботлаш ишлари бошланган. 2016 йилнинг ўзидаёқ «Хаббл» телескопи ёрдамида бир нечта кузатиш ишлари олиб борилган. Олимлар унинг 20 га яқин суратини олишга эришган ва бу суратлар далил сифатида хизмат қилган. Объектга Гиппокамп деб ном берилган.
Олимларнинг фикрича, у бир неча йиллар аввал комета урилиши натижасида ажралиб қолган Нептуннинг энг йирик ички йўлдоши Протейнинг бир қисми бўлиши мумкин.
Изоҳ (0)