Ғузор туманидаги 2-умумтаълим мактаби туманда кўзга кўринган мактаблардан бири. Албатта, ўқувчиларга таълим-тарбия бериш борасида. Мактаб биносининг яроқлилиги ва ўқувчилар учун яратиб берилган шарт-шароит хусусида эса «шўрига шўрва тўкилганлардан».
Хизмат сафари билан умумтаълим мактабида бўлганимизда, синфхона линолеумларининг абгор ҳолга келганию, жуда эски парталар, оёқ қўйсанг поли ўпирилиб тушар даражага етган ўқув хоналарининг ҳолатини кўриб, тўғриси, кўнглимиз хира тортди. Дард устига чипқондек энг ёмони мактаб биноси ҳам чўкаётган экан.
Мактаб раҳбариятининг маълум қилишича, ўқув биноси бундан 20 йил олдин чўкишни бошлаган. Ўша пайтда бунинг олдини олиш мақсадида 60 тонна цемент бино деворларининг остки қисмига сувга аралаштирилиб, суваб чиқилган.
«Мактаб биносининг чўкиши бундан 20 йил олдин бошланганди, — дейди мактаб директорининг хўжалик ишлари бўйича ўринбосари Хайрулла Омонов. – Ўша пайтда бинонинг остки қисмига 60 тонна цемент сувга аралаштирилиб, деворга уриб чиқилганди. Аммо вақт ўтгани сари чўкиш ҳолати яна давом этмоқда».
Мактаб директори Нодира Рўёпованинг маълумот беришича, умумтаълим мактаби 1975 йил 624 ўринга мўлжаллаб барпо этилган бўлиб, ҳозирда 762 нафар ўқувчини бағрига сиғдирган.
«Мактабимиз 1975 йилдан бери бирор марта ҳам капитал таъмир қилинмаган, — дейди мактаб директори Нодира Рўёпова. – Шуни инобатга олган ҳолда 2018 йил капитал таъмирлаш учун 2 миллиард 200 миллион сўм маблағ ажратилганди. Аммо ёнимиздаги коллеж бўшаётганлиги сабабли «шу коллежни берамиз» деб капитал таъмирга ажратилган пулни қайтаришди».
Мактаб директорининг айтишича, ўқув даргоҳи аҳволи оғирлиги сабаб вилоят халқ таълими бошқармаси тавсияси билан капитал таъмирланиши лозим бўлган мактаблар сирасига киритилган.
«Ҳатто тендер ўтказилиб, тендерда ютган қурувчи ташкилот раҳбари ҳам мактабимизга келиб, эртаси куни ишчилари ишни бошлашини билдирганди, — дейди мактаб директори. – Кейин мени ўша пайтда бошқарма бошлиғи сифатида ишлаб келаётган Лазиз Холов чақиртириб, ёнимиздаги коллеж бўшаётганлиги сабабли қурилиш ишлари тўхтатилишини айтди».
Нодира Рўёповага кўра, Ғузор тумани ҳокими Саъдулла Бобоқулов мактаб директорига муаммони тез орада ҳал этишини, мактаб ёнида жойлашган Ғузор транспорт касб-ҳунар коллежини фойдаланишга олиб беришини айтиб, вилоят ҳокимига хат билан чиққанини билдирган.
«Коллежнинг 270 нафар битирувчиси бор экан, — дейди мактаб директори. – Келаси йил сентябрь ойидан бошлаб коллеж бўшайди. Шунда бино халқ таълими Вазирлиги ихтиёрига ўтказилиб, бизга фойдаланиш учун берилар экан».
«Бўшаб қолган коллеж биноларини мактабларга бериш масаласини маҳаллий ҳокимиятлар мустақил равишда ҳал этолмайди, — дейди Қашқадарё вилоят ўрта махсус, касб-ҳунар таълими ҳудудий бошқармаси бошлиғи Камол Янгибоев. – Мазкур масала юзасидан вилоят ҳокимлиги томонидан умумтаълим мактабларида 10–11-синфлар қайта ташкил этилгани боис синфхоналари етишмаётган мактабларга 700–800 ўринга мўлжалланган коллежлар биносининг бўш турган қисмини вақтинча фойдаланиб туриши учун бериш тўғрисида топшириқ бериляпти. Бироқ, бинони буткул топшириб қўёлмаймиз. Масалан Деҳқонобод туманидаги 70-умумтаълим мактаби туман марказидаги Агро саноат касб-ҳунар коллежининг бўш турган синфхоналаридан фойдаланиб турибди. Ғузор туманидаги мазкур 2-умумтаълим мактаби ҳам ёнида жойлашган Ғузор транспорт касб-ҳунар коллежининг бўш турган синфхоналаридан фойдаланиши мумкинлиги кўзда тутилган».
Мазкур жараённи ўрганаётган пайтимиз 2-умумтаълим мактаби директори Нодира Рўёпова қўнғироқ қилиб, биз мактабда бўлиб қайтган кунимизнинг эртасигаёқ вилоят ҳокими ўринбосари Долли Аллаев бошчилигидаги ишчи гуруҳ мактабда бўлганлигини, тез орада мактаб коллежга ўтиши мумкинлигини айтганини билдирди. Ва ишчи гуруҳнинг мактабда бўлганини исботловчи суратларни тақдим этди.
Мутасаддиларнинг муаммога эътибор қаратгани қувонарли ҳол, албатта. Аммо ҳамма гап ижро қандай якун топишида. Биз ҳолатни кузатамиз ва мавзуга албатта қайтамиз.
Изоҳ (0)